Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 313 Hüküm no: 407 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Yahya Beşe adlı çocuğun vasîsinin bal satışı davasında Mustafa Beşe ile sulh olduğu Mahmiye-i Galata hâricinde vâki‘ Mü[eyyedzâde mahallesi sâ]kinlerinden olup bu[ndan] akdem vefât eden merhûm Yahya Beşe b. Abdullah nâm müteveffânın sulbiye kızı Havva nâm sagīre[ye] kıbel-i şer‘den vasî nasb olunan Cinâne bt. Hasan nâm hâtun meclis-i şer‘-i şerîf-i lâzımü’t-tevkīrde işbu hâmil-i hâze’l-kitâb Dergâh-ı âlî yeniçerilerden Mustafa Beşe b. Abdullah nâm râcil muvâcehesinde takrîr-i da‘vâ edip sagīre-i mezbûre Havva’ya babası merhûm Yahya Beşe’den irs-i şer‘le intikāl eden hissesinden mahrûse-i Üsküdar kazâsına tâbi‘ Kalburcu demekle ma‘rûf karyede olan on dört kıt‘a kovanını mezkûr Mustafa Beşe gabn-i fâhiş ile bin akçeye iştirâ etmiş hâlen vesâyetim hasebiyle suâl olunup mûcebin taleb ederin dedikde gıbbe’s-suâl merkūm Mustafa Beşe zikr olunan on dört kıt‘a kovanı bundan akdem husûs-ı mersûmeyi bey‘a ve semenini kabza ve îsâle vekîl olan Yunus Beşe b. Abdullah nâm kimesneden iştirâ eylemişimdir deyû cevâb verip mastûre Cinâne Hâtun merkūm Yunus Beşe’yi vekîl eylediğini inkâr edip ba‘de’l-inkâr mezbûr Yunus Beşe dahi vech-i meşrûh üzre vekâlet-i merkūmeyi isbâtdan âciz olmağla mâbeyne muslihûn tavassut edip zikr olunan on dört kıt‘a kovandan beş kıt‘a kovana sulh edip bedel-i sulh olan beş kıt‘a kovanı vesâyetim hasebiyle mezbûr Mustafa Beşe yedinden alıp kabz edip husûs-ı mezbûra müte‘allik zimmetini ibrâ ve iskāt eyledim ba‘de’l-yevm husûs-ı mezbûra müte‘allik bi’z-zât ve bi’l-vâsıta da‘vâ ve taleb zuhûr ederse lede’l-hükkâmi’l-kirâm [mesmû‘a] olmaya dedikde mukırra-i merkūmenin vech-i meşrûh üzre olan kelimâtını merkūm Mustafa Beşe vicâhen tasdîk ve şifâhen tahkīk ettikden sonra sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî bi’t-taleb kayd olundu. Tahrîren fi’t-târihi’l-mezbûr. Şuhûd: Es-Sâbikūn fi’l-varaki’s-sâbık