Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 323 Hüküm no: 421 Orijinal metin no: [61a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine bt. Resul’ün Hüseyin Bey’deki alacağını tahsil ettiği Mahmiye-i Galata dâhilinde vâki‘ Bereketzâde mahallesi sâkinlerinden olup bundan akdem vefât eden merhûm Hüseyin Bey b. Abdullah nâm müteveffânın muhallefâtına vâzı‘ü’l-yed olup mahmiye-i mezbûre ve Havâss-ı Kostantıniyye’de beytülmâl emîni olan Mehmed Çavuş b. Abdullah ve Davud Çavuş b. Abdullah ve beytülmâl-i mesfûrun nâzırı olan Mustafa Bey b. Abdullah nâm kimesneler meclis-i şer‘-i şerîf-i lâzımü’t-tevkīrde işbu sâhibü’l-kitâb müteveffâ-yı mezbûrun zevce-i metrûkesi olan Âmine bt. Resul nâm hâtun muvâcehesinde takrîr-i kelâm ve ta‘bîr ani’l-merâm edip mezkûre Âmine zevci merhûm-ı mezkûrun zimmetinde bi hasebi’ş-şer‘i’ş-şerîf Mustafa b. Ahmed ve el-Hâc Rıdvan b. Abdullah nâm kimesneler şehâdetleri ile on bin akçe mehr-i müecceli ve on bin akçe dahi alâ tarîki’l-mudârebe isbât eylediği hakkı ve merhûm-ı mezkûrun cümle muhallefâtından intikāl eden rub‘ hissesi mukābelesinde alâ sebîli’t-tehârüc on iki bin akçeye zimmetini ibrâ ve iskāt edip meblağ-ı merkūm on iki bin akçeyi mersûm Âmine Hâtun’a teslîm eyledik, ol dahi alıp kabûl ve kabz edip zimmetimizi ibrâ-i âm ile ibrâ ve iskāt-ı tâm ile iskāt eyleyip ba‘de’l-yevm husûs-ı mezbûra müte‘allik da‘vâ ve nizâ‘ı kalmadı dediklerinde mukırrûn-ı mersûmûnun vech-i meşrûh üzre olan kelimâtını mastûre Âmine Hâtun vicâhen tasdîk ve şifâhen tahkīk ettikden sonra sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî ketb ve terkīm olunup yed-i tâlibe vaz‘ olundu. Tahrîren fî evâsıtı Zilka‘de sene sitte ve elf. Şuhûd: Es-Sâbikūn