|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 337 Hüküm no: 437 Orijinal metin no: [64b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hüseyin Bey’in Perviz Bey’den peynir satın aldığı ve kalan alacağı olmadığı
Mahmiye-i Galata dâhilinde vâki‘ Bereketoğlu mahallesi sâkinlerinden olup bundan akdem vefât eden merhûm Hüseyin Bey b. Abdullah nâm cündînin muhallefâtına vâzı‘ü’l-yed olup mahmiye-i mezbûre ve Havâss-ı Kostantıniyye’de beytülmâl-i hâs emîni olan fahrü’l-ümenâ Mehmed Çavuş b. Abdullah ve Davud Çavuş b. Abdullah ve beytülmâl-i mezbûrun nâzırı olan Mustafa Bey b. Abdullah nâm kimesneler meclis-i şer‘-i şerîf-i lâzımü’t-tevkīrde işbu sâhibü’l-kitâb Hâslar kazâsına tâbi‘ Bosna Filibozu demekle ma‘rûf yaylakda vâki‘ mandıraları mutasarrıf olan Perviz Bey b. Abdullah nâm cündînin muvâcehesinde takrîr-i kelâm edip merhûm-ı mezbûr Hüseyin Bey hâl-i hayâtında ve kemâl-i sıhhatinde mersûm Perviz Bey’e peynir için yetmiş bin nakd-i râyic fi’l-vakt akçe verip hâlen meblağ-ı merkūm yetmiş bin akçeden otuz beş bin yedi yüz altmış sekiz akçesini emânet ve nezâretimiz hasebiyle alıp kabz edip bâkī zimmetinde otuz dört bin iki yüz otuz iki akçe kalmış suâl olunup mûcebin taleb ederiz dediklerinde gıbbe’s-suâl mersûm Perviz Bey meblağ-ı merkūm yetmiş bin akçeden bâkī kalan otuz dört bin iki yüz otuz iki akçelik müteveffâ-yı mesfûr Hüseyin Bey’e hâl-i hayâtında ve kemâl-i sıhhatinde peynirden meblağ mersûm yetmiş bin akçeden zimmetimde bir akçe ve bir habbe bâkī kalmamışdır dedikde fi’l-vâki‘ merhûm-ı mezbûra otuz dört bin iki yüz otuz iki akçelik hâl-i hayâtında ve kemâl-i sıhhatinde peynir verdiğine beyyine taleb olundukda udûl-i müslimînden Mehmed b. Kasım ve Rıdvan Bey b. Abdullah el-Cündî ve Sefer Bey b. Abdullah nâm kimesneler li ecli’ş-şehâde meclis-i şer‘-i şerîfe hâzırûn olup gıbbe’l-istişhâdi’ş-şer‘î şöyle şehâdet-i şer‘iyye eylediler ki fi’l-vâki‘ müteveffâ-yı mezbûr Hüseyin Bey’e hâl-i hayâtında ve kemâl-i sıhhatinde otuz dört bin iki yüz otuz iki akçelik peyniri bizim huzûrumuzda teslîm eylemişdir husûs-ı mezbûra şâhidleriz ve şehâdet dahi ederiz dediklerinde şehâdetleri hayyiz-i kabûlde vâki‘ oldukdan sonra mâ hüve’l-vâki‘ bi’t-taleb ketb olunup yed-i tâlibe vaz‘ olundu. Tahrîren fî evâsıtı Zilka‘de sene sitte ve elf. Şuhûd: Es-Sâbikūn
|