Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 338 Hüküm no: 438 Orijinal metin no: [64b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Reis’in ödünçten Haydar b. Abdullah’ta alacağı olduğu Udûlden Veli Reis b. Ali ve Süleyman Reis b. Mehmed nâm kimesneler meclis-i şer‘-i şerîf ve mahfil-i dîn-i münîfe hâzırân olup, dâhil-i mahmiye-i Galata mahallâtından Şehsüvar mahallesinde bundan akdem fevt olan merhûm Haydar b. Abdullah’ın Ömer, Osman ve Âmine nâm evlâd-ı sıgārına kıbel-i şer‘den mansûb vasî olan Mehmed Reis b. Abdullah nâm kimesne mahzarında, hâmil-i hâze’l-kitâb Ahmed Reis b. İlyas’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı merkūm hâl-i hayâtında ve kemâl-i sıhhatinde bizim yanımızda ve katımızda zimmetinde müdde‘î-i mezbûra karz-ı şer‘î cihetinden râyicü’l-vakt bin beş yüz akçe deyni olduğunu ikrâr ve i‘tirâf etti. Müdde‘î-i mesfûrun meblağ-ı merkūmu kısmen veya tamâmen müteveffâ-yı mezkûrdan veya vekîlinden ahz ü kabz etmediğine, hibe etmediğine, bi vechin mine’l-vücûh zimmetini ibrâ etmediğine dâir yemîn etmesinden sonra şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın hâkim-i askerî, şehâdetleri mûcebince meblağ-ı mezbûrun müteveffâ-yı mezbûrun muhallefâtından müdde‘iye-i mersûmeye ödenmesine hükm etti. Cerâ ve hurrire fî evâsıtı Zilka‘de sene sitte ve elf. Şuhûd: Said b. Abdullah, Hasan b. Abdullah, el-Hâc Mustafa b. Murad, Mustafa b. Ali, Mehmed b. Ali, Murad b. Abdullah ve gayruhüm mine’l-hâzırîn