Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 362 Hüküm no: 474 Orijinal metin no: [71a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil b. Mehmed’in, gemisindeki hizmetinden dolayı Hasan Reis’te alacağı kaldığı Udûlden Hasan b. Osman ve Yakub b. Veli nâm kimesneler meclis-i şer‘-i şerîf-i refî‘ ve mahfil-i dîn-i münîf-i menî‘a hâzırân olup, hâl-i hayâtında mahmiye-i Kostantıniyye mahallâtından Gül Câmi‘i mahallesinde sâkin iken bundan akdem İskenderiye’de fevt olan merhûm Hasan Reis b. Süleyman’ın Ali ve Sabiha nâm sagīreynine kıbel-i şer‘den mansûb vasî olan Şaban b. Sevindik nâm hasm-ı câhid mahzarında, hâmil-i hâze’l-kitâb Halil b. Mehmed’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘î-i merkūmun müteveffâ-yı mezkûrun zimmetinde, gemisindeki hizmeti sebebiyle râyicü’l-vakt bin akçe hakkı vardı. Müdde‘î-i mersûm meblağ-ı merkūmdan ( ) kadarını aldı. Müdde‘î-i mezbûra bâkī meblağ-ı merkūmu müteveffâ-yı mesfûrdan asâleten veya vekâleten kısmen veya tamâmen ahz ü kabz etmediğine, bi vechin mine’l-vücûh zimmetini ibrâ etmediğine yemîn verildiğinde ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra hâkim-i muvakki‘-i a‘lâ hâze’l-kitâb, şehâdetleri mûcebince meblağ-ı mersûmun, müteveffâ-yı merhûmun muhallefâtından müdde‘î-i merkūma ödenmesine hükm etti. Cerâ zâlike ve hurrire fi’l-yevmi’l-ışrîn mine’l-Muharremi’l-harâm min şühûri sene seb‘a ve elf. Şuhûdü’l-hâl: Şükür b. Himmet, Ahmed b. Abdullah, Yusuf b. Abdullah, Keyvan b. Abdullah, Memi b. Abdullah, Ahmed b. Nasuh, Mustafa b. Mahmud, Mustafa b. Ali el-Muhzır, Hüsrev b. Abdullah el-Muhzır ve gayruhüm mine’l-hâzırîn