Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 57 Hüküm no: 12 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin Kazancı Velisar’a olan borcuna karşılık bazı eşyalarını rehin olarak verdiği Kazgancı tâifesinden Velisar v. Todori nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mustafa Beşe b. Mehmed nâm kimesne muvâcehesinde ikrâr-ı tâm ve takrîr-i kelâm mezbûr Mustafa Beşe’ye cihet-i deyn-i şer‘den târîh-i kitâbdan üç yüz altmış gün tamamına müeccel ve mev‘ûd elli kıt‘a riyâl[î] guruş deynim olup meblağ-ı mezbûr mukābelesinde Kazgancı Alanson’a iki yüz on beş vakıyye demir ve bir kürk rehin vaz‘ ve teslîm edip ol dahi irtihân ve tesellüm ve kabz eylemişdir. Ecel-i mezbûr hulûlünde meblağ-ı mezbûru merkūm Mustafa Beşe’ye edâ ve teslîme iktidârı olmadıkda rehin vaz‘ olunan eşyâyı bey‘ edip deynim olan meblağ-ı mezbûru merkūm Mustafa Beşe’ye edâ ve o ziyâdeyi bana teslîme işbu hâzır bi’l-meclis Kazgancılar kethüdâsı İbrahim Beşe b. İskender nâm kimesneyi tarafımdan vekîl ta‘yîn eyleyip ol dahi vekâlet-i mezbûreyi kabûl eyleyip mâ-vaka‘a kayd şüd. 15 Receb sene 1063. Şuhûdü’l-hâl: Arslan Beşe b. Abdullah, Hüseyin Beşe b. Mehmed, Bali Beşe b. Abdullah, Rıdvan b. Abdullah.