Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 407 Hüküm no: 545 Orijinal metin no: [81b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mümine bt. Ramazan’ın kocasından kalan miras hissesini aldığı Bundan akdem hâric-i Galata mahallâtından Firuz Ağa mahallesinde vefât eden merhûm Nuh Bâli’nin zevce-i metrûkesi olan Mümine bt. Ramazan Reis mahfil-i kazâda müteveffâ-yı mezbûrun vâlidesi ve sagīr oğlu Abdülbâkī’ye kıbel-i şer‘den vasî nasb olunan Aynî bt. Yusuf nâm hâtun mahzarında ikrâr ve takrîr-i kelâm edip müteveffâ-yı mezbûrun cümle muhallefâtı otuz iki bin [akçe] olup bana âid olan sümün hisse-i şer‘iyyemden dört bin akçeye vefâ eder muhallefâtı olmayıp lâkin mahalle-i mezbûrede vâki‘ iki bâb evleri kısmet defterinde otuz bin akçeye tahmîn olunup zikr olunan dört bin akçe hisse-i şer‘iyyem dahi zikr olunan evlerden ta‘yîn olunup ben dahi kabûl eyledim dedikde mukırra-i mezbûrenin vech-i meşrûh üzre olan ikrârını mezbûre Aynî bi’l-muvâcehe tasdîk eyledikden sonra mâ hüve’l-vâki‘ ketb ve tahrîr olunup yed-i tâlibe vaz‘ ve def‘ olundu. Tahrîren fî evâili şehri Rebî‘ilevvel sene seb‘a ve elf. Şuhûd: Hasan b. İskender el-Kâtib, Süleyman Reis b. Musa, Veli b. Yusuf, Hüsrev b. Abdullah, Sâdık b. Mustafa el-İmâm ve gayruhüm