Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 408 Hüküm no: 546 Orijinal metin no: [81b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayni bt. Yusuf’un miras hissesini aldığı Bundan akdem hâric-i Galata mahallâtından Firuz Ağa mahallesinde vefât eden merhûm Nuh Bâli’nin vâlidesi olan Aynî bt. Yusuf nâm hâtun mahfil-i kazâda müteveffâ-yı mezbûrun zevce-i metrûkesi olan Mümine bt. Ramazan Reis muvâcehesinde ikrâr ve takrîr-i kelâm edip müteveffâ-yı merkūmdan mezbûre Mümine’ye hisse-i şer‘iyye dört bin akçe ve bana beş bin üç yüz otuz üç akçe intikāl edip lâkin sâir urûzdan ben bin yedi yüz yirmi dört nakid akçe kabz eyleyip bâkī üç bin altı yüz dokuz akçe kalıp sâir muhallefâtı olmayıp mahalle-i mezbûrede iki bâb evi kısmet defterinde otuz bin akçeye tahmîn olunup benim zikr olunan üç bin altı yüz dokuz akçe hisse-i şer‘iyyem ile mezbûre Mümine’nin hisse-i şer‘iyyesi olan dört bin akçe zikr olunan evlerden ta‘yîn olunup bâkī kalan yirmi iki bin altı yüz altı akçe müteveffâ-yı mezbûrun sulbî oğlu sagīr Abdülbâkī’ye ta‘yîn olundu dedikde mukırra-i mezbûrenin vech-i meşrûh üzre olan ikrârını mukarrun lehe’l-merkūme Mümine Hâtun bi’l-muvâcehe tasdîk edicek mâ hüve’l-vâki‘ tahrîr olundu. Tahrîren fî evâili şehri Rebî‘ilâhir sene seb‘a ve elf. Şuhûdü’l-hâl: Hasan Kâtib b. İskender, Süleyman Reis b. Musa, Veli b. Yusuf, Hüsrev b. Abdullah, Sâdık b. Mustafa el-İmâm ve gayruhüm