Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 423 Hüküm no: 564 Orijinal metin no: [84b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Efendi’nin evi mirasçılardan satın aldığı Mahmiye-i Galata mahallâtından Sultan Bayezid mahallesinde bundan akdem fevt olan merhûm mi‘mâr Mustafa Ağa’nın evlâd-ı sıgārına kıbel-i şer‘den vasî olan el-Hâc Yusuf b. Abdullah mahfil-i kazâda merhûm-ı merkūmun kebîr oğlu olup menzil-i âti’z-zikre vâzı‘ü’l-yed olduğu şer‘an sâbit olan sâhibü’l-mecd ve’l-ihtirâm sâhibü ezyâli’l-izzi ve’l-ihtişâm sâbıkan şehremîni olan İbrahim Efendi mahzarında takrîr-i kelâm edip müşârün-ileyh İbrahim Efendi’nin hâlen tasarrufunda olup mahalle-i mezbûrede vâki‘ bir tarafı yine müteveffâ-yı mezbûr mülkü ile bir tarafı mesfûr İbrahim Efendi mülkü ile iki tarafı tarîk-i âm ile mahdûd olup ulvî ve süflî bir evi ve bir zulleyi ve bir kenîfi müştemil olan menzil müteveffâ-yı merkūmun cümle muhallefâtından olup veresesine intikāl etmiş iken hâlen mezbûr İbrahim Efendi cümlesine mutasarrıf olup sıgār-ı merkūmûnun hisselerini vesâyetim hasebiyle zabt ve tasarruf etmeğe bana mâni‘ olur vâki‘ hâl suâl olunup sıgār-ı mezbûrûna bi hasebi’ş-şer‘ âid olan hisseleri ta‘yîn olunmak için beyne’l-verese taksîm olunmasını taleb ederim dedikde gıbbe’s-suâl mezbûr İbrahim Efendi cevâb verip menzil-i mahdûd bundan akdem kâfire iken müteveffât olan vâlidem Kiryako’nun mülkü olup hâlike oldukda ber vech-i inhisâr vârisleri olan karındaşı Lofrence ve kız karındaşı Bernadro nâm zimmîlere irsle intikāl eyledikden sonra mezbûrân zimmîlerden yirmi bin akçeye şirâ-i şer‘î ile iştirâ eyledim mülk-i müşterâmdır deyû mazmûnu takrîrine mutâbık ve mefhûmu müdde‘âsını nâtık dokuz yüz doksan bir târihinde mahmiye-i mezbûrede hilâfete müvellâ olan mevlânâ Yahya Efendi imzâsıyla mümzâ ve hatemiyle mahtûme hüccet-i şer‘iyye ibrâz eyledikde vasiyy-i merkūm mazmûn-ı hüccet-i merkūmeyi münkir olmağın mezbûr İbrahim Efendi’den mazmûn-ı hüccet-i merkūmeye beyyine taleb olundukda Ahmed Çelebi b. Mehmed ve Ali Çavuş b. Mehmed nâm kimesne[ler] meclis-i şer‘a hâzırân olup fi’l-hakīka mezbûr İbrahim Efendi menzil-i mahdûd-ı merkūmu hâlike olan anası mezbûre Kiryako’nun mülkü olup mezbûrân Lofrence ve Bernadro’ya irsle intikāl edip mezbûrân Lofrence ve Bernadro’dan mûmâ-ileyh İbrahim Efendi yirmi bin akçeye şirâ-i şer‘î ile iştirâ eyleyip bu husûs yine târih-i mezbûrda hilâfeten müvellâ olan müşârün-ileyh Yahya Efendi huzûrunda hüccet-i şer‘iyye oldu hüccet-i merkūmenin mazmûnuna biz şâhidleriz şehâdet dahi ederiz deyû bi’l-muvâcehe edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl ve isre’t-tezkiyye ani’l-kabûl şehâdetleri makbûle olup mâ hüve’l-vâki‘ alâ vukū‘ihî ketb ve tahrîr olunup yedine vaz‘ olundu. Tahrîren fî evâili şehri Rebî‘ilevvel sene seb‘a ve elf. Şuhûd: Ahmed Çavuş b. Hüseyin eş-şehîr bi Hammamcızâde, Ali Çavuş Mustafa, Cafer Çavuş [b.] Abdullah, Derviş Bey [b.] Mustafa, Mehmed Reis [b.] İbrahim, Abdi [b.] Ahmed