Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 425 Hüküm no: 567 Orijinal metin no: [85a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban b. Abdullah’ın Macar asıllı câriyesini vasiyet yoluyla azat etmiş olduğu Mahmud Bey b. Abdullah ve Ömer Çavuş b. Süleyman meclis-i şer‘-i şerîfe hâzırân olup, Tophâne mahallâtından Tomtom mahallesinde bundan akdem fevt olan merhûm Şaban b. Abdullah’ın muhallefâtına vâzı‘-ı yed olan mahmiye-i Galata ve tevâbi‘inde vâki‘ beytülmâl-i hâs emîni fahrü’l-a‘yân Mehmed Çavuş b. Abdülmennân mahzarında, müteveffâ-yı merkūmun muhallefâtı cümlesinden olduğu zu‘muyla merhûmun sâir muhallefâtıyla zabt edilen açık kaşlı, kara gözlü, esmer, Macariyyetü’l-asl hadd-i bülûğa erişmemiş Rukiye bt. Abdullah nâm müdde‘iyeye hâkim tarafından vekîl-i müsahhar nasb edilen Mustafa Çelebi b. Abdülaziz’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki mezbûr Şaban Bey b. Abdullah hâl-i hayâtı ve kemâl-i akl ve sıhhatinde câriye-i sagīre-i mevsûfeyi “maraz-ı mevtimden kırk gün mukaddem hürsün” diyerek tedbîr-i mukayyed ile tedbîr eyledi. Mezbûr Şaban Bey iyileşdi ve müddet-i mezkûreden fazla yaşadı. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın şehâdetleri mûcebince ve mezheb-i muhtâra tevfîkan mârrü’z-zikr efendisinin cemî‘ mâlından ıtkına hükm edildi. Câriye-i mezbûre bu sûretle sâir harâir-i asliyyât gibi hürre oldu. Cerâ zâlike ve hurrire fî evâili şehri Cumâdelûlâ sene seb‘a ve elf. Şuhûd: Sefer Çelebi b. İsmail, el-Hâc Ramazan b. Mustafa, Mustafa Çelebi b. Ahmed, Abdi Reis b. Ahmed, Hüsrev b. Abdullah ve gayruhüm