Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 78 Hüküm no: 60 Orijinal metin no: [14a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsbât-ı beyyineden acz ve davalılara yemîn verilmesi Mahmiye-i Galata tevâbi‘inden Cezîre-i Mîr Ali’de Sığ burnu limanına giren sefînesinde bundan akdem vefât eden Turgut Reis b. Ali Bey zevce-i metrûkesi Sâliha bt. Abdullah nâm hâtunun husûs-ı âti’l-beyâna vekîl-i şer‘îsi olup vekâleti hasm-ı câhid mahzarında nehc-i şer‘ üzre sâbit olan Mustafa Bey b. Abdullah nâm bevvâb-ı sultânî ve mahmiye-i mezbûre kazâsında emîn-i beytülmâl-i hâs olan fahrü’l-ümenâ Mahmud Çavuş b. Ahmed nâm kimesne mahfil-i kazâda merhûm-ı mezbûrun sefînesi huddâmı olan Ahmed b. Ali ve Siyâmi b. Himmet ve Mustafa b. Şaban ve İslâm b. Şaban ve Hızır b. Mehmed ve Turgut b. Receb ve Mahmud b. Mehmed ve Hasan b. Mehmed nâm kimesneler mahzarlarında takrîr-i da‘vâ edip mezbûrûn Ahmed ve Siyâmi ve Mustafa ve İslâm ve Hızır ve Turgut ve Mahmud ve Hasan merhûm-ı merkūmun zikr olunan sefînesinde vâki‘ muhallefâtından arpasını ve buğdayını ve alefini ve gemi âlâtını ve sermâyesini bilâ-vechin vaz‘-ı yed edip ahz u kabz etmişler suâl olunmaları matlûbumuzdur dedikde gıbbe’s-suâl ve akībe’l-inkâr vekîl-i mezbûra ve emîn-i mûmâ-ileyhe da‘vâ-yı mezbûrelerine beyyine taleb olundukda ityân-ı beyyineden izhâr-ı acz ettiklerinde mezbûrûn Ahmed ve Siyâmi ve Mustafa ve İslâm ve Hızır ve Turgut ve Mahmud ve Hasan merhûm-ı mezbûrun zikr olunan muhallefâtından bir habbe ve bir nesne saklamadığına ve saklamadıklarına vekîl-i mezbûr ve emîn-i mûmâ-ileyh talebleriyle tahlîf olunduklarında onlar dahi vech-i meşrûh üzre yemîn-i billâhi’l-aliyyi’l-azîm ettiklerinde mâ vaka‘a gıbbe’t-taleb ketb olundu. Cerâ fi’t-târihi’l-mezbûr. Şuhûdü’l-hâl: es-Sâbikūn