Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 108 Hüküm no: 102 Orijinal metin no: [25b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksi v. Koroya’nın kefaletten kaynaklanan borcunu Mehmed b. Mahmud’a ödediği Mahmiye-i Galata hâricinde Kasım Paşa câmi‘i şerîfi mahallesi sâkinlerinden olup Donanma-yı hümâyûn seferinde Akdeniz’de bundan akdem vefât eden merhûm el-Hâc Mehmed b. Mahmud’un sulbî sagīr oğlu Mustafa’ya vasiyy-i muhtâr olup vesâyet-i nehc-i şer‘î üzre sâbite olan fahrü’r-rüesâi’l-hâssa İbrahim Bey b. Mustafa nâm kimesne mahfil-i kazâda mahmiye-i mezbûre dâhilinde vâki‘ Karaköy demekle ma‘rûfe mahalle sâkinlerinden Aleksi v. Koroya nâm zimmî mahzarında vesâyeten takrîr-i da‘vâ edip merhûm-ı mezbûrun deyn-i şer‘îden Dimitri v. Kostantin nâm zimmînin zimmetinde elli bir sikke altın hakkına merkūm Aleksi îcâb ve kabûlü hâvî kefâletle kefîl-bi’l-mâl olmağla meblağ-ı mezbûrun yirmi sikke altın merhûm-ı mezbûr el-Hâc Mehmed hâl-i hayâtında mesfûr Aleksi’den ahz u kabz edip bâkī otuz bir sikke altın kalmış idi. Hâlen vesâyetim hasebiyle otuz bir sikke altını taleb ederim dedikde gıbbe’s-suâl mezbûr Aleksi bi’l-muvâcehe cevâbında fi’l-vâki‘ meblağ-ı mezbûr elli bir sikke altına vech-i meşrûh üzre kefîl oldum lâkin meblağ-ı mesfûr elli bir sikke altını mezbûr el-Hâc Mehmed’e hâl-i hayâtında bi’t-tamâm edâ eyledim deyip vasiyy-i mezbûr İbrahim Çelebi vech-i meşrûh üzre edâyı münkir oldukda mezkûr Aleksi’den sıdk-ı makāline beyyine taleb olundukda udûl-i müslimîn ve ahrâr-ı muvahhidînden Mustafa b. Ali ve el-Hâc Rıdvan b. Abdullah nâm kimesneler li ecli’ş-şehâde mahfil-i kazâya hâzırân olup gıbbe’l-istişhâdi’ş-şer‘î edâ-i şehâdet-i şer‘iyye edip fi’l-vâki‘ merhûm-ı mezbûr el-Hâc Mehmed hâl-i hayâtında ve kemâl-i akl ve sıhhatinde Donanma-yı hümâyûn seferinde gittiği zamânda merkūm ....? mezbûr Aleksi vech-i meşrûh üzre kefîl olduğu meblağ-ı mezbûr elli bir sikke altını bi’t-tamâm bana edâ ve teslîm eyledi zimmetinde bir akçe ve bir habbe hakkım kalmadı diye ikrâr-ı sahîh-i şer‘î eyledi bu husûsa şâhidleriz şehâdet dahi ederiz deyip edâ-i şehâdet-i şer‘iyye eylediklerinde ba‘de’l-kabûl şehâdetleri hayyiz-i kabûlde vâkı‘a olmağın mûcebiyle hükm olundu mâ vaka‘a gıbbe’t-taleb ketb olundu. Cerâ fi’t-târihi’l-mezbûr. Şuhûdü’l-hâl: Şükrullah Efendi b. İbrahim, Abdülkerim Efendi b. Mehmed, Ali b. Mustafa, Mehmed b. Mustafa, Mehmed b. Yusuf el-Muhzır ve gayruhüm