Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 111 Hüküm no: 106 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çeşitli para vakıflarına nâzır atanması Mahmiye-i Galata tevâbi‘inden Tophane’de Fîruz Ağa mahallesi avârızına merhûm İskender vakf eylediği bin akçenin ve merhûm kadı Üveys vakf eylediği bin akçenin ve merhûme Mümine Hâtun vakf eylediği bin akçenin ve el-Hâc Durmuş vakf eylediği dört bin akçenin ve merhûme diğer Mümine Hâtun vakf eylediği bin akçenin ve merhûm-ı mezkûr Cemal vakf eylediği bin akçenin ve merhûme Aynî Hâtun vakf eylediği iki bin ve merhûme Mümine Hâtun vakf eylediği bin akçenin ve merhûm Memişah vakf eylediği beş bin akçenin ve Safiye Hâtun vakf eylediği üç bin akçenin ve İdris vakf eylediği bin akçenin ve merhûme Kâmile Hâtun vakf eylediği bin akçenin ve merhûm Mercan vakf eylediği bin akçenin ve Kamer bt. Sinan Hâtun hâssa tabbahlardan Mehmed Ağa b. Abdullah vakf eylediği bin akçenin nâzırı olmayıp nâzır lâzım olmağın hâmil-i hâze’l-kitâb mûmâ-ileyh Mehmed Ağa hasbî nâzır nasb ve ta‘yîn olundu mûmâ-ileyh Mehmed Ağa nezâret-i mezbûreyi kabûl edip cemî‘-i hıdemâtını üzerine alıp evkāf-ı mezbûrenin her husûsuna mütevellîsi nâzır-ı mûmâ-ileyh ma‘rifeti ve izni yok iken mübâşeret etmemesine tenbîh olunup mâ vaka‘a gıbbe’t-taleb ketb olundu. Cerâ fî evâhiri Zilhicce sene hamse aşere ve elf. Şuhûdü’l-hâl: Beyti b. İsmail, Hüseyin b. Mehmed el-ma‘rûf bi Arabzâde, Mehmed b. Yusuf, Mustafa b. Mehmed ve gayruhüm