Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 138 Hüküm no: 152 Orijinal metin no: [37a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs Hâtun’dan intikal eden evin mülkiyyeti üzerindeki ihtilafın halli Mahmiye-i Galata dâhilinde merhûm Sultan Bayezid Han aleyhi’r-rahmetü ve’l-gufrân mahallesinde bundan [akdem] vefât eden merhûme Belkıs Hâtun’un zevci ve vârisi olan zümre-i râcilînden Mehmed Beşe b. Abdullah nâm râcil mahfil-i kazâda merhûme-i mezbûrenin babası olup menzil-i âti’l-beyân yedinde olduğu nehc-i şer‘î üzre sâbit olan hâssa kalafatçıları zümresinden Mehmed Bey b. Abdullah mahzarında takrîr-i da‘vâ edip mezbûr kalafatî Mehmed Bey kızı merhûme-i mesfûre Belkıs’a hâl-i sıhhatinde mahalle-i mezbûrede vâki‘ olup iki beyt-i ulvîyi ve bir sofayı ve bir bi’r-i mâyı ve matbahı müştemil olup hudûdunun bir cânibi Manola nâm Nasrâniye mülküne ve bir cânibi Manol nâm zimmî mülküne ve bir cânibi kendi mülküne ve bir cânibi tarîk-i âmma müntehî olup hibe-i sahîh-i şer‘î ile hibe ve teslîm edip mezbûre Belkıs dahi meclis-i hibede kabz ve tesellüm eylediği menzilin merhûme-i mezbûreden irs-i şer‘le bana intikāl etmişken bilâ-vech-i şer‘î cümlesine vaz‘-ı yed edip tasarruf eder mezbûr kalafatî Mehmed Bey’e suâl olunması matlûbumdur dedikde gıbbe’s-suâl menzil-i mezbûr benim mülk-i müşterâmdır ol ecilden tasarruf ederim deyip hibe-i mezbûreyi bi’l-külliye inkâr eyledikde mezbûr râcil Mehmed Bey’den menzil-i mezbûr merhûme-i mezbûrenin mülk-i mevhûbu olup muhallefâtından olduğuna beyyine taleb olundukda ityân-ı beyyineden âciz olmağın mezbûr kalafatî Mehmed Bey’e menzil-i mezbûru kızı merhûme-i merkūmeye hibe etmeyip ve menzil-i mezbûr merhûme-i mesfûrenin muhallefâtında olmadığına yemîn teklîf olundukda mezbûr kalafatî Mehmed Bey dahi vech-i meşrûh üzre yemîn-i billâhi’l-aliyyi’l-azîm eyledikde mâ vaka‘a gıbbe’t-taleb ketb olundu. Cerâ zâlike fî evâhiri Muharrem sene sitte aşere ve elf. Şuhûdü’l-hâl: Mehmed Halîfe b. Ali el-İmâm, Abdi Kapudân b. Sefer, Davud Bey b. Cafer, Rüstem Bey b. Abdullah, Mehmed b. Bahşî, Mustafa b. Hüseyin, Ferruh b. Abdullah, Mehmed Bey b. Abdullah ve gayruhüm