Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 139 Hüküm no: 154 Orijinal metin no: [37b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe’nin takas beyânını Mehmed Bey ve Hatice’nin kabûl ettiği Mahmiye-i Galata dâhilinde Sultan Bayezid Han mahallesinde bundan akdem vefât eden merhûme Belkıs Hâtun’un zevc-i metrûkü ve vârisi olan zümre-i râcilînden Mehmed Beşe b. Abdullah merhûme-i mezbûrenin vâlidesi Hatice Hâtun bt. Mehmed ve babası ve sulbî sagīr oğlu Mustafa’ya kıbel-i şer‘den mansûb vasî olan Mehmed Bey b. Abdullah mahzarlarında bi’t-tav‘i’s-sâf ikrâr ve i‘tirâf edip merhûme-i mezbûrenin hâl-i hayâtında ve kemâl-i sıhhatinde mülk-i mahzı olan esbâblarından beş yüz doksan akçeye bir kırmızı ferâce ve dört yüz akçeye bir kırmızı atlas kaftan ve dört yüz beş akçeye bir kadife döşek yüzü bey‘ ve temlîkle kabz edip ve merhûme-i mezbûrenin muhallefâtından ba‘de’l-vefât seksen akçeye bir ...? düveyi iştirâ edip semeni zimmetimde kalıp ve iki bin beş yüz akçe mehr-i müeccel olup cem‘an zimmetimde dört bin on beş akçesi olmuşdur ve merhûme-i mesfûrenin muhallefâtından kassâm defterinde taksîm olunduğu üzre iki bin iki yüz sekiz akçe hisse-i şer‘iyyesi olup mezbûrân Mehmed Bey ve Hatice Hâtun rızâlarıyla merkūme-i mezbûrenin techîz ve tekfînine malımdan iki yüz akçe harc etmiş idim meblağ-ı mezbûr iki bin iki yüz sekiz akçeyi ve harc eylediğim iki yüz akçeyi mezbûrân Mehmed Bey ve Hatice Hâtun rızâ ve kavlen kabûlleriyle zimmetimde olan meblağ-ı mezbûr dört bin akçenin iki bin dört yüz sekiz akçesine takās eyledim zimmetimde olan bin altı yüz yedi bâkī kalmışdır dedikde mezbûr Mehmed Beşe’nin vech-i meşrûh üzre sâdır olan ikrârını mezbûr Mehmed Bey ve Hatice vicâhen tasdîk ve şifâhen tahkīk eylediklerinde mâ vaka‘a gıbbe’t-taleb ketb olundu. Cerâ zâlike fî evâili Muharrem sene sitte aşere ve elf. Şuhûdü’l-hâl: Mehmed Efendi b. Ali, Abdi Kapudân b. Sefer, Mehmed Bey [b.] İsa, Mehmed b. Rıza?, Mustafa b. Yusuf, Mustafa b. Yusuf