Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 140 Hüküm no: 155 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ali’nin ve Seyyid Veli’nin buğday alacağı iddiasından vazgeçilip zimmetin ibrâ edilmesi es-Seyyid Ali b. es-Seyyid Bayezid nâm kimesne mahmiye-i Galata tevâbi‘inden Tophane’de Fındıklı kurbunda Yırtlaz? Hasan mahallesi sâkinlerinden olup vilâyet-i Rumeli’nde Aydos kazâsında vâki‘ Burgos nâm iskelede vefât eden merhûm es-Seyyid Üveys b. es-Seyyid Fethullah’ın zevce-i metrûkesi ve vârisesi Müslime bt. el-Hâc Hüseyin nâm hâtunun husûs-ı âti’l-[bey‘a] vekîl-i şer‘îsi olup vekâleti hasm-ı câhid mahzarında nehc-i şer‘î üzre sâbite olan [es-Seyyid] Veli b. es-Seyyid İsmail nâm kimesne meclis-i şerî‘at-i garrâda el-Hâc Musa b. Hüseyin ve M[ehmed] b. el-Hâc Ahmed nâm kimesneler mahzarlarında vekâleten ve asâleten bi’t-tav‘i’s-sâf ikrâr ve i‘tirâf edip mezbûrân el-Hâc Musa ve Mehmed merhûm es-Seyyid Üveys’den hâl-i sıhhatinde zikr olunan iskelede kendi mağazasında her kilesi yüz üçer buçuk akçe hesâbı üzre Zağra kilesi ile dört yüz kile buğdayını kırk bir bin dört yüz akçeye iştirâ eyleyip lâkin teslîm-i semen [ve] kabz-ı mebî‘ olmayıp nısfı mezbûr es-Seyyid Ali’nin ve nısfı merhûm-i merkūmun olup zâhirde vârisi olmamak zu‘muyla zikr olunan iskelede emîn-i beytülmâl olan Kankar nâm Nasrâniye cânib-i mîrî için emânet-i mahkiyesi hasebiyle zabt ve kabz eylediği merhûm-ı mezbûrun zikr olunan buğdayını merkūmân el-Hâc Musa ile Mehmed’den da‘vâ ve taleb ettiğimizde beynimizde münâza‘ât-ı kesire vâkı‘a olmuş idi hâlâ zikr olunan buğdaya müte‘allik da‘vâdan asâleten ve vekâleten mezbûrân el-Hâc Musa ile Mehmed’in [38a] zimmetlerini ibrâ-i âm ile ibrâ ve iskāt-ı tâm ile iskāt eyledik ba‘de’l-yevm vekîl-i mezbûr es-Seyyid Veli müvekkilesi merkūme Müslime tarafından bi’z-zât ve bi’l-vâsıta ve mezbûr es-Seyyid Ali kendi tarafından bi’z-zât ve bi’l-vâsıta husûs-i mezbûra müte‘allik da‘vâ sâdıra olursa lede’l-hükkâmi’l-kirâm mesmû‘a ve makbûle olmaya dedikde mezbûr es-Seyyid Ali’nin ve vekîl-i merkūm es-Seyyid Veli’nin asâleten ve vekâleten vech-i meşrûh üzre sudûr eden ikrârlarını mesfûrân el-Hâc Musa ile Mehmed vicâhen tasdîk ve şifâhen tahkīk eylediklerinde mâ vaka‘a gıbbe’t-taleb ketb olundu Tahrîren fî evâsıtı Saferi’l-muzaffer sene sitte aşere ve elf Şuhûdü’l-hâl: es-Seyyid el-Hâc Nebi b. es-Seyyid Bayezid, el-Hâc Mustafa b. el-Hâc Sinan, el-Hâc Osman b. Receb, Mehmed Reis b. Mustafa, Veli b. Ramazan, Ali b. Mehmed, Veli b. Mehmed, Mustafa b. Mehmed, Mehmed b. Yusuf