Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 162 Hüküm no: 192 Orijinal metin no: [47a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. el-Hâc Ali’nin mehr-i müeccelini muhallefâttan aldığı Mahmiye-i Galata hâricinde Süheyl Bey mahallesinde bundan akdem vefât eden merhûm es-Seyyid Mustafa b. es-Seyyid Şaban’ın zevce-i metrûkesi ve vârisesi Âişe’nin babası ve husûsi âti’l-beyâna vekîl-i şer‘îsi olup vekâleti nehc-i şer‘î üzre sâbite olan Dergâh-ı âlî solaklarından el-Hâc Ali nâm kimesne mahfil-i kazâda merhûm-ı mezbûrun evlâd-ı sıgārı Mehmed ve Asiye ve Kamer’e vasiyy-i şer‘î olan Pîrî b. Abdi Reis nâm kimesne muvâcehesinde vekâleten takrîr-i kelâm edip müvekkilem mezbûre Âişe’nin merhûm-i mesfûrun zimmetinde olan on bin fıddî Osmânî akçe mehr-i müeccel hakkını merhûm-ı mezbûrun sûk-ı sultânîde füruht olan muhallefâtının semeninden vasiyy-i mesfûr yedinden bi’t-tamâm ahz u kabz eyledim vekîl-i mezbûr el-Hâc Ali’nin vech-i meşrûh üzre sudûr eden ikrârını vasiyy-i mezbûr Pîrî vicâhen tasdîk ve şifâhen tahkīk eyledikde mâ vaka‘a gıbbe’t-taleb ketb olundu. Cerâ zâlike fî evâili Rebî‘ilâhir sene sitte aşere ve elf. Şuhûdü’l-hâl: Mahmud Bey [b.] Abdullah, Beyti b. İsmail el-Münâdî, Hayreddin b. Musa, Ahmed b. Ali, Mehmed b. Ali, Mehmed b. Abdullah el-Münâdî, Mehmed b. Yusuf, Mustafa b. Mehmed ve gayruhüm