Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 59 Hüküm no: 15 Orijinal metin no: [3b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun ile Ahmed Bey’in muhalaa yoluyla boşandıkları Mahmiye-i İstanbul’da Hoca Hayreddin Mahallesi’nde sâkine Fâtıma Hatun bt. Süleyman Ağa b. Abdullah nâm bikr-i bâliga tarafından husûs-ı âti’l-beyâna vekîl olup hasm-ı câhid mahzarında mezbûreyi ma‘rifet-i şer‘iyye ile ârifân olan Mehmed Efendi b. Ahmed ve el-Hâc İbrahim b. Ahmed nâm kimesneler şehâdetleri ile vekâleti sâbite olan müvekkile-i merkūmenin babası olan Süleyman Ağa b. Abdullah meclis-i şer‘-i hatîr-i lâzımü’t-tevkīrde bâ‘isü hâze’l-kitâb Ahmed Bey b. Mehmed nâm cündî muvâcehesinde bi’l-vekâle ikrâr ve takrîr-i kelâm edip kızım müvekkile-i merkūme Fâtıma’nın zevc-i gayr-ı medhûlün-bihâsı olan mezbûr Ahmed Bey zimmetinde mütekarrer olan elli bin akçe mihr-i [müe]ccelinin nısfı ve nafaka-i iddet-i mu‘ayyene-i ma‘lûme ve meûnet-i süknâsı üzerine, mezbûr Ahmed Bey ile muhâla‘a edip hukūk-ı zevciyet ve sâir husûsa müte‘allika da‘vâdan herbirimiz âharın zimmetini ibrâ ve ıskāt eyledi, ba‘de’l-yevm mazmûn-ı kitâba muhâlif da‘vâ sudûr ederse lede’l-hükkâm-ı zevi’l-ihtirâm istimâ‘ ve ısgā olunmasın dedikde mezbûr Ahmed Bey dahi vech-i mu‘ayyen üzere zevcesi mezbûre Fâtıma ile nısf mehr-i müecceli yirmi beş bin akçe ve nafaka-i iddet ve meûnet-i süknâsı üzerine hul‘ edip zevciyet ve gayrı da‘vâdan zimmetini ibrâ ve ıskāt etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Recebi’l-mürecceb li-sene selâse ve sittin ve elf. Şuhûdü’l-hâl: Hüseyin Ağa b. Hasan, Mehmed Efendi b. İbrahim el-müderris, Mustafa Efendi [b.] Hasan, İbrahim Çelebi b. Hasan.