Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 197 Hüküm no: 249 Orijinal metin no: [61b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs Hâtun bt. Ali’nin mehr-i müeccel alacağına hükm edilmesi Udûlden imâm el-Hâc Hızır b. Murtaza ve Ahmed b. el-Hâc Şaban nâm kimesneler, bundan akdem vefât eden Süleyman Beşe b. Yakub’un muhallefâtını zabt eden mahmiye-i Galata’da vâki‘ yayalar beytülmâli emîni fahrü’l-a‘yân Mehmed Subaşı b. Davud mahzarında, müteveffâ-yı mezbûrun zevcesi ve vârisi Belkıs Hâtun bt. Ali nâm hâtun kıbelinden emîn-i müşârün-ileyhin muvâcehesinde husûs-ı âti’l-beyâna vekâleti şer‘an sâbit olan hâmil-i hâze’l-kitâb el-Hâc Hasan b. Mahmud’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müteveffâ-yı merkūm hâl-i hayâtında bizim yanımızda, üzerinde ve zimmetinde müvekkile-i mezbûrenin nikâhında ma‘kūd-i aleyh olan mehr-i müecceli cihetinden lâzimü’l-edâ ve vâcibü’l-kazâ râyicü’l-vakt üç bin akçe-i Osmânî hakkı olduğunu ikrâr ve i‘tirâf etti. Şehâdetleri ba‘de şerâiti’l-kabûl inde’ş-şer‘ mu‘teber ve makbûl oldukdan sonra ve müvekkile-i mezbûreye meblağ-ı merkūmu ondan veya vekîlinden tamâmen veya kısmen alıp kabz etmediğine, bi vechin mine’l-vücûhi’ş-şer‘iyye ve sebebin mine’l-esbâbi’l-mer‘iyye zimmetini ibrâ etmediğine dâir yemîn verilmesinin ardından şehâdetleri mûcebince hükm edildi. Cerâ zâlike ve hurrire fî târihi’l-mezbûr. Şuhûdü’l-hâl: es-Sâbikūn