Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 645 Hüküm no: 824 Orijinal metin no: [99b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Preşkova v. Yorgi’nin, ölen Panayot’taki alacağını vârislerin terekesinden tahsil ettiği Vilâyet-i Rumeli’nde kasaba-i Arhoz sâkinlerinden olup bundan akdem mahrûse-i Galata’da meyhâneci iken hâlik olan Preşkova v. Yorgi nâm zimmînin li ebeveyn karındaşı ve hasren vârisi olan Nikola v. ( ) nâm zimmînin sulbî kebîr oğlu ve tarafından husûs-ı âti’l-beyâna vekîl olup Yani v. Yorgi ve İlya v. Franko nâm zimmîler şehâdetleriyle şer‘an vekâleti sâbite olan Yani v. ( ) nâm zimmî meclis-i şer‘-i şerîfde medîne-i Üsküdar’a tâbi‘ Çengelköy nâm karye sâkinlerinden iken bundan akdem hâlik olan Panayot v. ( ) nâm zimmînin hasren vârisi olan sulbî sagīr oğlu Yamandi’nin vasiyy-i mansûbu olup hâlik-i mezbûr Panayot’un terekesine vâzı‘ü’l-yed olan işbu bâ‘isü’s-sifr Yorgi v. Panayot nâm zimmî muvâcehesinde ikrâr ve takrîr-i kelâm edip hâlik-i evvel-i mezkûr Preşkova’nın deyn-i şer‘îden hâlik-i mezbûr Panayot zimmetinde iki yüz elli esedî guruş hakkı olduğu şer‘an sâbit olmağla meblağ-ı mezbûr iki yüz elli esedî guruşu hâlik-i mezbûr Panayot’un vasiyy-i mezbûr Yorgi yedinde olan terekesinden vasiyy-i mezbûr yedinden bi’l-vekâle ahz u kabz eyledim meblağ-ı mezbûr iki yüz elli guruşdan bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Ahmed Beşe b. el-Hâc Sinan, Ahmed Beşe b. Mehmed, Mustafa Beşe b. Halil, Hasan Çelebi b. Ahmed.