Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 645 Hüküm no: 825 Orijinal metin no: [100a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Ali’nin ev eşyalarını karısı Âişe bt. İbrahim’e hibe ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i şerîfden irsâl olunan mevlânâ Mustafa Efendi b. Muharrem mahmiye-i İstanbul’da Ayasofya-i Sagīr kurbunda Hüseyin Ağa mahallesinde Mehmed Efendi b. Ali’nin sâkin olduğu menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i mübîn ettikde müşârün-ileyh Mehmed Efendi meclis-i ma‘kūd-ı mezbûrda zevce-i menkûhası işbu bâ‘isetü’l-kitâb Âişe bt. İbrahim nâm hâtun mahzarında ikrâr ve takrîr-i kelâm edip yedimde mülküm ve hakkım olan dokuz köhne yemeni yastık ve dört beyaz minder ve üç beledî döşek ve sagīr köhne kaliçe ve dört köhne yemeni yorgan ve dört beyaz çarşaf ve bir neftî köhne yan kebesi ve bir köhne yemeni yük perdesi ve bir sagīr kaliçe seccâde ve iki köhne sepet sandığı ve bir kebîr bakır sini ve iki sagīr bakır güğüm ve bir kebîr bakır güğüm ve bir sagīr bakır tava ve iki sagīr bakır tencere ve bir kebîr bakır tencere ve yedi bakır sahan ve bir sagīr bakır leğen ve bir sagīr bakır kepçemi mezbûre Âişe Hâtun’a hibe-i sahîha-i şer‘iyye ile hibe ve teslîm edip ol dahi meclis-i hibede ittihâb ve kabûl ve kabz ve tesellüm eyledi min ba‘d minvâl-i muharrer üzre zikr olunan eşyâ-i mezbûre Âişe Hâtun’un mülkü mevhûbudur, keyfe mâ teşâ’ ve tahtâr mutasarrıfe olsun dedikde mukırr-ı mezbûrun minvâl-i meşrûh üzre cârî ve sâdır olan ikrârını mezbûre Âişe vicâhen ve şifâhen tahkīk ve tasdîk etmeğin husûs-ı mezbûru mevlânâ-yı mezbûr mahallinde tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Ahmed Efendi b. Mehmed, Mustafa Çelebi b. ( ) el-Müezzin, Mustafa Çelebi b. Ahmed el-Müezzin, Mehmed Efendi el-Müezzin, el-Hâc Rıdvan b. Abdullah Bevvâb-ı sultânî, Mahmud b. Mehmed, Mustafa Çelebi b. Mehmed.