Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 646 Hüküm no: 826 Orijinal metin no: [100a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Ağa b. Mehmed’in, satın aldığı evde Abdülkerim Efendi b. Mehmed’in şüf‘a talebinin reddedildiği Mahmiye-i İstanbul’da Kapıağası mahallesi sükkânından bâ‘isü’l-kitâb İbrahim Ağa b. Mehmed nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Abdülkerim Efendi b. Mehmed nâm kimesne mahzarında takrîr-i kelâm ve ta‘bîr ani’l-merâm edip gāibe ani’l-meclis Âişe Hâtun bt. ( ) arsa ve binâsı mülkü olup mahalle-i mezbûrda vâki‘ bir tarafdan arsa ve binâsı mülküm olan menzil ve bir tarafdan kezâlik mezbûr Abdülkerim Efendi’nin mülk menzili ve bir tarafdan kezâlik düstûr-ı mükerrem müşîr-i müfahham vezîr-i rûşen-zamîr Musli Paşa menzili ile mahdûd menzilini bin iki yüz esedî guruşa bundan akdem bana bey‘ ve teslîm ve kabz-ı semen edip ben dahi ba‘de’l-iştirâ ve’t-tesellüm menzilime ilsâk için târih-i kitâbdan on iki gün mukaddem akd günü mâbeyn duvarını deldiğimde mezbûr Abdülkerim Efendi kendi menzilinden görüp taleb-i müvâsebe edip menzilinde âhardan kimesne olmamağla karındaşı Şaban nâm kimesnenin âhar yerde olan menziline varıp tekrâr taleb edip lâkin benim yanımda yâhud mebî‘-i mezbûr yanında taleb-i işhâd etmeyip bilâ-özr üç gün sükût etmekle şuf‘ası bâtıl olmuşken mezbûr Abdülkerim Efendi mebî‘-i mezbûru şuf‘a ile alırım deyû bana mu‘ârazadan hâlî değildir suâl olunup men‘ olunmak matlûbumdur dedikde gıbbe’s-suâl mezbûr Abdülkerim Efendi kaziyye minvâl-i muharrer üzre olup yevm-i mezbûrda bey‘-i mezbûra vâkıf olup vech-i mübeyyen üzre taleb-i müvâsebe ettiğimden sonra müşterî-i mezbûr yâ mebî‘-i mezbûr yanında taleb-i işhâd etmeyip bilâ-özr üç gün sükût ettiğini ikrâr etmeğin mûcebince mezbûr Abdülkerim Efendi’nin vech-i meşrûh üzre sükût şuf‘ası mubtıl olmağın mezbûr Abdülkerim Efendi vech-i muharrer üzre mu‘ârazadan men‘ olunmağın mâ vaka‘a bi’t-taleb ketb olundu. Fi’l-yevmi’s-sâbi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Ahmed Efendi el-Keşşâf, İbrahim Çelebi b. Ahmed, İbrahim Çelebi b. Mehmed, çukadâr Hasan b. Abdullah.