Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 647 Hüküm no: 827 Orijinal metin no: [100a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Süleyman b. Şaban’ın enseri bahasından Yusuf Ağa b. Abdurrahman’daki alacağını tahsil ettiği Enserci tâifesinden el-Hâc Süleyman b. Şaban nâm kimesne meclis-i şer‘-i şerîf-i lâzımü’t-teşrîfde umdetü’l-muhadderât tâcü’l-mestûrât aliyyetü’z-zât safiyyetü’s-sıfât Rukiye Sultan hazretlerinin bin yetmiş üç senesi Rebî‘ulâhiri’nden bin yetmiş beş Şa‘bânı’na gelince kethüdâları olan umdetü’l-emâsil ve’l-a‘yân bâ‘isü’l-kitâb Yusuf Ağa b. Abdurrahman mahzarında bi’t-tav‘i’s-sâf ikrâr ve i‘tirâf edip mûmâ-ileyh Yusuf Ağa zimmetinde Sultân-ı müşârün-ileyhânın kethüdâsı iken binâsına sarf için benden iştirâ ettiği beynimizde ma‘lûm enseri semeninden hakkım olan yedi bin akçeyi bi’d-defe‘ât mûmâ-ileyh Yusuf Ağa yedinden ahz ve istîfâ eylediğimden sonra husûs-ı mezbûra ve gayra müte‘allika âmme-i hukūk-ı ma‘lûme ve mechûle da‘vâsından mûmâ-ileyh Yusuf Ağa’nın zimmetini mûmâ-ileyh Yusuf Ağa’nın kethüdâlığı hâlinde akd ile sultân-ı müşârün-ileyhânın zimmetinde olan hukūk-ı ma‘lûme ve mechûle da‘vâsından Sultân-ı müşârün-ileyhânın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîk mâ vaka‘a bi’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü’l-müderrisîn Ahmed Efendi [b.] eş-Şeyh Abdullah, fahrü’l-kuzât Mahmud Efendi, fahrü’l-eşbâh Ahmed Ağa b. Abdurrahman, fahrü’l-akrân Eyüb Ağa Kethüdâ-yı hazret-i efendi, fahrü’l-eşbâh Mehmed Çavuş.