Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 647 Hüküm no: 828 Orijinal metin no: [100a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Sâkioğlu Hüseyin’in Hüseyin Çelebi b. Bayram’a sattığı atın bedelinin ödendiği Vilâyet-i Anadolu’da Kastamonu sancağında Köni kazâsına tâbi‘ Bozarmurd? nâm karyede sâkin iken vefât eden Sâkioğlu Hüseyin nâm kimesnenin verâseti li ebeveyn er karındaşı Ali’nin sagīr oğlu Mehmed’e münhasıra olduğu şer‘an zâhir oldukdan sonra sagīr-i mezbûr Mehmed’in vasîsi ve vâlidesi Zâhide bt. Mahmud nâm hâtun mahfil-i kazâda bâ‘isü’l-kitâb Hüseyin Çelebi [b.] Bayram nâm kimesne mahzarında üzerine da‘vâ ve takrîr-i kelâm edip sagīr-i mezbûrun ammisi müteveffâ-yı mezbûr Hüseyin kable’l-vefât mezbûr Hüseyin’e bir re’s kır aygır atını otuz esedî guruşa bey‘ ve teslîm edip semenini kable’l-ahz vefât etmekle ben dahi sagīr-i mezbûrun vasîsi olduğum hasebiyle bundan akdem meblağ-ı mezbûrdan yirmi bir buçuk esedî guruşu mezbûr Hüseyin bana edâ ve teslîm edip sekiz buçuk esedî guruş zimmetinde kalmışidi suâl olunsun dedikde gıbbe’s-suâl mezbûr Hüseyin cevâbında mârrü’z-zikr atı müteveffâ-yı mezbûrdan ancak müdde‘iyye-i mezbûrenin kabzını mu‘terife olduğu yirmi bir buçuk esedî guruşa iştirâ ettiğini ikrâr, ziyâdeyi inkâr etmeğin müdde‘iyye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Hüseyin fi’l-hakīka müteveffâ-yı mezbûrdan mârrü’z-zikr atı yirmi bir buçuk esedî guruşdan ziyâdeye iştirâ etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm etmeğin mûcebince müdde‘iyye-i mezbûre bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’r-râbi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Hasan Çelebi b. Ahmed, Baba Resul [b.] Rıdvan, İbrahim Çelebi b. Mehmed, Mehmed Beşe b. Rıdvan .