Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 648 Hüküm no: 829 Orijinal metin no: [100a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Kurd’un Hüseyin’e verdiği borca Hatice bt. Abdullah’ın kefil olmadığı Mahmiye-i İstanbul’da Mi‘mâr Sinan mahallesi sâkinelerinden Âişe bt. Kurd nâm hâtun meclis-i şer‘-i şerîfde işbu bâ‘isetü’l-kitâb Hatice bt. Abdullah nâm hâtun mahzarında üzerine da‘vâ [ve] takrîr-i kelâm edip gāib ani’l-meclis Hüseyin b. ( ) nâm kimesne zimmetinde cihet-i deyn-i şer‘îden hakkım olan bin beş yüz akçeye mezbûr Hatice emr [ve] kabûlü hâviye kefâlet-i sahîha-i şer‘iyye ile kefîl olmağın suâl olunup kefâletlerine binâen meblağ-ı mezbûrun mezbûre Hatice’den alıverilmesi matlûbumdur dedikde gıbbe’s-suâl ve’l-inkâr müdde‘iyye-i mezbûre Âişe’den müdde‘âsını mübeyyine beyyine taleb olundukda ityân-ı beyyineden izhâr-ı acz etmeğin istihlâf etmeğin müdde‘iyye-i mezbûre Âişe’nin gāib-i mezbûr Hüseyin zimmetinde cihet-i mezbûrdan hakkı olan bin beş yüz akçeye kefîl olmayıp cihet-i kefâletinden meblağ-ı mezbûr müdde‘iyye-i mezbûreye zimmetinde vâcibü’l-edâ deyni olmadığına mezbûre Hatice’ye yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm etmeğin mûcebince müdde‘iyye-i mezbûre Âişe bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâmin min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çavuş b. İbrahim, Ahmed b. Mehmed, İbrahim b. Mehmed, Hasan b. Ahmed, Mustafa b. Ahmed.