Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 52 Hüküm no: 23 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol v. Misket’in kapısının önünde ölen Minho’nun ölümüyle alakasının olmadığının anlaşılması Sebeb-i tahrîr-i kitâb oldur ki, Mahmiye-i Galata’da hâlâ beytülmâl emîni olan fahrü’l-akrân Mahmud Çavuş b. İbrahim tarafından ikrâr-ı âti’z-zikre vekîl olup, vekâleti ber-nehc-i şer‘î sâbite olan Osman Bey b. Hüsrev nâm cündî meclis-i şer‘-i hatîr-i lâzımü’t-tevkīrde, mahmiye-i mezbûre mahallâtından Sultan Bayezid mahallesi sâkinlerinden işbu râfi‘ü’l-kitâb Manol v. Misket nâm zimmî mahzarında bi’l-vekâle ikrâr ve takrîr-i kelâm edip, mezbûr zimmînin mahalle-i mezbûrede vâki‘ menzilinin kapısı önünde Minho nâm zimmî mürd bulunup, zâhirde dahi vâris-i ma‘rûfu olmayıp dem ve diyeti beytülmâle âid olmağla, ehl-i mahalle-i mezbûrenin alâkası olmayıp müvekkil-i mersûm Mahmud Çavuş, mezbûr Manol’e mezkûr Minho’yu sen katl eyledin deyû hâkimü’ş-şer‘ huzûrunda da‘vâ eyledikde, mezbûr Manol dahi merkūm Minho tarîk-i âmda hatfe enfihî mürd olmuş mezbûrun fevtinde vechen mine’l-vücûh alâkam yoktur deyû cevâb verip, müvekkil-i mesfûr dahi da‘vâsına muvâfık beyyineden âciz olup ve hâlik-i mezbûrun dahi üzerinde eser-i darb ve eser-i cerâhat olmamağın, merkūm Minho’nun dem ve diyetine müte‘allik da‘vâdan ferâğ eyledi dedikde, vekîl-i merkūmun ikrâr-ı meşrûhunu mezbûr Manol bi’l-muvâcehe tasdîk edip, [mâ] hüve’l-vâki‘ bi’t-taleb kayd olundu. Tahrîren fi’l-yevmi’s-sâbi‘ aşer min şehri Recebi’l-mürecceb li sene isneyn ve ışrîn ve elf. Şuhûdü’l-hâl: El-Hâc Mustafa [b.] Murad, el-Hâc Rıdvan [b.] Abdullah, Mahmud b. Ali, Ahmed Çelebi b. Ali, Mustafa b. Ali, Haydar Ağa [b.] Abdullah ve gayruhüm.