Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 53 Hüküm no: 25 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksandra bt. Papa Todori’nin Papa Yani aleyhine açtığı mülk menzil davasında haksız olduğu Havâss-ı Aliyye’ye tâbi‘ Karfa nâm karye sâkinlerinden verâseti sulbî oğlu Papa Yani ve sulbiye kızı Aleksandra’ya münhasıra olup, bundan esbak helâk olan Papa Todori v. Yani nâm zimmînin kızı merkūme Aleksandra tarafından husûs-ı âti’z-zikre vekîl olup, Andriye v. Yorgi ve Dimola v. İstemad şehâdetleri ile hasm-ı câhid mahzarında vekâleti sâbite olan zevci Aleksi v. Gori nâm zimmî meclis-i şer‘-i şerîfde, menzil-i âti’z-zikre vâzı‘ü’l-yed olup zi’l-yed idiği nehc-i şer‘î üzre sâbit olan merkūm Papa Yani mahzarında üzerine bi’l-vekâle takrîr-i da‘vâ edip, hâlik-i mezbûrun cümle terekesinin sülüsânı merkūm Papa Yani’ye ve sülüsü merkūme Aleksandra’ya intikāl eylemiş iken mezbûr Papa Yani hâlik-i mezkûrun terekesinden karye-i merkūmede vâki‘ bir tarafı Yorgi v. Preşkova mülküne ve bir tarafı Argiri v. İstemad mülküne ve bir tarafı Kosta v. İstemad mülküne ve bir tarafı tarîk-i âma müntehî olan menzili müstakil tasarruf edip, müvekkile-i mezbûrenin menzil-i mezkûrdan hisse-i şer‘iyyesin vermede te‘allül eder suâl olunması matlûbumdur dedikde, gıbbe’s-suâl mersûm Papa Yani fi’l-vâki‘ menzil-i mezkûr mukaddemâ hâlik-i mezbûr babamız Papa Todori’nin mülkü olup, lâkin hâl-i hayâtında ve kemâl-i sıhhatinde târih-i kitâbdan on yıl mukaddem menzil-i mezbûru bi cümleti’t-tevâbi‘ babam merkūm Todori’den on dokuz bin beş yüz nakid akçeye iştirâ eyledim mülk-i müşterâmdır deyip vekîl-i mezbûr Aleksi münkir olucak mezbûr [11a] Papa Yani’den sıdk-ı makāline [muvâfık] beyyine taleb olundukda, karye-i merkūmeden Dimitri v. Dimitri ve Andriye v. Yorgi nâm zimmîler meclis-i şer‘-i şerîfe li ecli’ş-şehâde hâzırân olup gıbbe’l-istişhâdi’ş-şer‘î, fi’l-vâki‘ mezbûr Papa Yani menzil-i mezkûru vech-i muharrer üzre babası hâlik-i mezbûr Papa Todori’den târih-i kitâbdan on yıl mukaddem on dokuz bin beş yüz akçeye bizim huzûrumuzda iştirâ eyledi. Mülk-i müşterâsıdır. Biz bu husûsa şâhidleriz şehâdet dahi ederiz, deyû edâ-i şehâdet-i şer‘iyye ettiklerinde, ba‘de ri‘âyeti şerâiti’l-kabûl şehâdetleri makbûle olup, mûcebiyle hüküm birle bu vesîka-i enîka ketb olunup, yed-i tâlibe vaz‘ ve def‘ olundu. Tahrîren fi’l-yevmi’s-sâlis min Saferi’l-hayr li sene selâse ve ışrîn ve elf. Şuhûdü’l-hâl: Ali Bey [b.] Abdullah, Mustafa Bey [b.] Abdullah, Mehmed Bey [b.] Abdullah er-Râcil, Ahmed Çelebi b. İbrahim, Mustafa el-Muhzır, Yani v. İstad, Kiraksi [v.] Manol, Yorgi v. Yani, Vasil v. Yani, Vasil [v.] Yani. Kosta v. Yani ve gayruhüm.