Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 649 Hüküm no: 830 Orijinal metin no: [100b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Abdülkerim b. Ali’nin, Hüseyin Beşe b. Ahmed’den satın aldığı câriyeyi kusuru gerekçesiyle geri vermek istediği, ancak yapılan muayenede böyle olmadığının tespit edildiği Mahmiye-i İstanbul’da Molla Güranî mahallesinde sâkin el-Hâc Abdülkerim b. Ali nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Hüseyin Beşe b. Ahmed nâm kimesne mahzarında üzerine da‘vâ ve takrîr-i kelâm edip mezbûr Hüseyin Beşe hâzıre bi’l-meclis evsâfı beynimizde ma‘lûme Rûsiyyetü’l-asl Timurhan bt. Abdullah nâm câriyesini cemî‘ uyûbdan sâlime olmak üzre târih-i kitâbdan yirmi gün mukaddem yüz otuz kıt‘a esedî guruşa bana bey‘ ve teslîm ben dahi iştirâ ve kabûl ve kabz ve tesellüm eyledikden sonra semen-i mezbûrdan on beş esedî guruşunu kendiye def‘, bâkī yüz on beş esedî guruş yedimden müşterâ ve makbûza evsâfı beynimizde ma‘lûme Rûsiyyetü’l-asl Mülâyim bt. Abdullah nâm câriye semeninden mezbûr Hüseyin Beşe zimmetinde hakkım olan yüz on beş esedî guruşa takās edip ol dahi mukāssa ve kabûl eylemişidi, lâkin mevsûfe-i mezbûre Timurhan hâmil ve mu‘ayyebe olup ayb-ı mezbûr bâyi‘-i mezbûr yanında mevcûd olmağla suâl olunup ihkāk-ı hak olunmak matlûbumdur dedikde, teveccüh-i husûmet için mezbûre Timurhan huddâm-ı mahkemeden Mehmed b. Ahmed ve Veli b. Mahmud nâm kimesneler ile kābilâtdan olup husûs-ı mezbûr için taraf-ı sultâniyeden ta‘yîn olunan Havva bt. Abdullah nâm hâtun irsâl olundukda mezbûre Havva mevsûfe-i mezbûre için hâmil değildir deyû haber verdiğini mezbûrân Mehmed ve Veli meclis-i şer‘a gelip ihbâr ettiklerinde mezbûr Hüseyin Beşe’ye suâl tevcîh etmemeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Bey b. Abdullah, İbrahim Çelebi b. ( ), Mustafa Çelebi b. Ahmed, Baba Resul [b.] Rıdvan.