Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 649 Hüküm no: 831 Orijinal metin no: [100b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Hüseyin’in, ölen Filibe kadısı Emin Mehmed Efendi’deki alacağı hususunda açtığı davada sulh olduğu Mahrûse-i Üsküdar’da Mehmed Paşa mahallesi sükkânından Mehmed Ağa b. Hüseyin nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de mahmiye-i İstanbul’da Pirinççi Sinan mahallesi ahâlîsinden olup mahrûse-i mezbûrda ( ) kazâsından ma‘zûlen vefât eden merhûm Emin Mehmed Efendi’nin hasren vârisleri olan zevce-i metrûkesi Belkıs bt. Abdullah ve kebîre kızları Ümmühâni ve Âişe ve kebîr oğlu İsmail Çelebi tarafından husûs-ı âti’l-beyâna vekîl olduğu mezbûrân zâtlarını ma‘rifet-i şer‘iyye ile ârifân Ahmed Hoca b. Sefer ve Hüseyin Beşe b. İsmail nâm kimesneler şehâdetleri ile şer‘an sâbit olan umdetü’l-müderrisîni’l-kirâm Ahmed Efendi b. eş-Şeyh Abdullah Efendi mahzarında ikrâr ve takrîr-i kelâm edip merhûm-ı mezbûr mahrûse-i mezbûre[de] kadı iken mahrûse-i mezbûre[ye] taraf-ı saltanatdan sürsat nâzil oldukda ben kethüdâsı olmağla merhûm-ı mezbûr mahrûse-i mezbûre kurâsından sürsatı cem‘ ve tahsîl eyle sana iki yüz guruş vereyim deyû bana emr etmekle, ben dahi kırk elli gün bey‘ edip cem‘ ve tahsîl etmekle ecr-i mislimi müteveffâ-yı mezbûr mukaddemâ Filibe kadısı olup ben çukadârı iken benim iki sîm balta ve iki sîm raht ve bir sırma üsküfü ahz ve istihlâk etmekle eşyâ-i mezbûrenin misli olanının mislini ve kıyemi olanının kıymetini merhûm-ı mezbûrun tereke-i vâfiyesinden verin deyû bundan akdem verese-i mezbûreden da‘vâ ettiğimde anlar dahi bi’l-külliye inkâr etmekle beynimizde nizâ‘-ı küllî vukū‘undan sonra [muslihûn] tavassut edip verese-i mezbûre ile beynimizde kırk beş esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûru işbu mahalde vekîl-i mûmâ-ileyh Ahmed Efendi yedinden tamâmen ahz u kabz edip husûs-ı mezbûra müte‘allika âmme-i de‘âvâdan merhûm-ı mezbûru ve vereseyi ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Fahrü’l-eşbâh Osman Çavuş b. ( ) el-Mübâşir, umdetü’l-a‘yân Yusuf b. Abdullah, Osman Efendi [b.] Himmet, umdetü’l-kuzât Mahmud Efendi, fahrü’l-a‘yân Abdullah Ağa, Mustafa Çelebi b. Abdullah.