Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 64 Hüküm no: 43 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âsiye bt. Hacı Mehmed’in menzil hissesini Veli b. İslâm’a sattığı Galata hâricinde kasaba-i Kasımpaşa mahallâtından Yeldeğirmeni mahallesi sâkinlerinden iken vefât eden Musli Reis b. Ahmed nâm müteveffânın zevce-i metrûke ve vârisesi Âsiye bt. el-Hâc Mehmed nâm hâtun meclis-i şer‘-i kavîmde, müteveffâ-yı mezbûrun li ebeveyn ammisi ve vârisi Veli b. İslâm mahzarında ikrâr ve i‘tirâf edip, müteveffâ-yı mezbûrun terekesinden olup mahalle-i mezbûrede vâki‘ bir tarafı Belkıs Hâtun mülkü ve bir tarafı Keyvan Reis mülkü ve bir tarafı tarîk-i hâs ve bir tarafı [tarîk-i] âm ile mahdûd olup, üç beyt-i süflîyi ve bir ulvîyi ve bi’r-i mâyı ve kenîfi ve muhavvatayı müştemil olan menzilden irs-i şer‘le bana intikāl eden dört sehimden bir sehim hisse-i şâyi‘amı, mezbûr Veli’ye iki bin üç yüz yirmi beş akçeye bey‘-i bâtt-ı sahîh-i şer‘î ile bey‘ edip, teslîm-i mebî‘ kabz-ı semen eyledim. Ba‘de’l-yevm hisse-i merkūme mezbûrun mülk-i müşterâsıdır, keyfe mâ yeşâ’ tasarruf eylesin dedikde, mukırre-i merkūmenin ber vech-i meşrûh sudûr eden ikrârını mezbûr Veli vicâhen ve şifâ[hen] tasdîk ettikde, mâ-vaka‘a bi’t-taleb ketb olundu. [15b] Tahrîren fî evâili şehri Rebî‘ilâhir li sene selâse ve ışrîn ve elf. Şuhûdü’l-hâl: Mehmed b. Ali el-İmâm, Muharrem b. Mustafa el-Müezzin, Mustafa b. Mahmud er-Reis, Ahmed b. Hızır el-Müderris, Mehmed b. Abdullah, Mustafa b. Mehmed el-Muhzır ve gayruhüm.