Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 650 Hüküm no: 832 Orijinal metin no: [100b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bedros v. Toros’un, Abdullah b. Abdullah’taki sof bahasından alacağına Mustafa Ağa b. Osman’ın kefil olmadığı Sofçu tâifesinden Bedros v. Toros nâm zimmî meclis-i şer‘-i şerîfde bâ‘isü’l-kitâb Mustafa Ağa b. Osman nâm kimesne mahzarında üzerine da‘vâ ve takrîr-i kelâm edip yedimden müşterâ ve makbûz iki sof ferâce ve bir top ve bir donluk sof bahâlarından Abdullah b. Abdullah nâm kimesne zimmetinde hakkım olan elli dört esedî guruşa mezbûr Mustafa Ağa kefîl olmuşdur, suâl olunup kefâletine binâen meblağ-ı mezbûrun mezbûr Mustafa Ağa’dan alıverilmesi matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müdde‘î-i mezbûrun vech-i muharrer üzre sof bahâlarından mezbûr Abdullah zimmetinde hakkı olan elli dört esedî guruşa kefîl olmadığına mezbûr Mustafa Çelebi’ye yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. ( ) Kethüdâ-yı muhzırân, İbrahim Çelebi b. Ahmed, Hasan Çelebi b. Ahmed, Baba Resul b. Rıdvan.