Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 73 Hüküm no: 54 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Kemaleddin’in miras hususunda Mustafa Çelebi b. Hasan’ın zimmetini ibra etmesi Medîne-i Hazret-i Ebî Eyyûbi’l-Ensârî -radiye anhu Rabbühü’l-Bârî- mahallâtından Nazperver mahallesinde sâkin iken bundan akdem vefât eden Kamer bt. Abdullah nâm müteveffânın usûbet-i nesebiyye tarîki ile vârisesi fahrü’l-muhadderât Fâtıma Hâtun bt. Kemaleddin tarafından husûs-ı âti’l-beyâna vekîl olup, mahmiyye-i Kostantıniyye mahallâtından Nevbethâne mahallesi sâkinlerinden fahrü’l-eimme Musa Efendi b. İsa ve Ahmed b. Osman şehâdetleri ile vekâleti sâbite olan sulbî oğlu Mehmed Bey b. Mirza meclis-i şer‘-i şerîfde, müteveffât-ı merkūmenin sulbiye sagīre kızı Âişe’ye kıbel-i şer‘-i mutahhardan vasî nasb olunup, vesâyeti hasebiyle müteveffât-ı merkūme Kamer’in terekesine vâzı‘ü’l-yed olan zevci Mustafa Çelebi b. Hasan mahzarında bi’l-vekâle ikrâr ve i‘tirâf edip, müteveffât-ı merkūme Kamer’in cümle terekesini arûz ve cevârî kısmından on iki sehim takdîr olunup, beş on iki sehmin altı sehmi kızı merkūme Âişe’ye ve üç sehmi zevci merkūm Mustafa’ya isâbet etmiş idi. El-hâletü hâzihî mezbûre Fâtıma’ya isâbet eden bir sehim hisse-i şer‘iyyesi mukābelesinde bi tarîki’l-müsâlaha tehârüc-i şer‘î tarîki üzre vasiyy-i mezbûr Mustafa yedinden vekâletim hasebiyle bin üç yüz otuz üç nakd-i râyic [21a] fi’l-vakt akçe[ye] ahz ve kabz eyledim. Tereke-i merkūmede müvekkilem mezbûre Fâtıma’nın cidden alâkası kalmadı. Eğer ba‘de’l-yevm tereke-i merkūmeye müte‘allika da‘vâ ederse lede’l-hükkâm mesmû‘a olunmasın dedikden sonra yine müteveffât-ı merkūmenin kezâlik usûbet-i nesebiyye cihetinden vârisi olan Ahmed b. Osman meclis-i şer‘de vasiyy-i mezbûr Mustafa mahzarında ikrâr ve i‘tirâf edip, müteveffât-ı merkūme Kamer’in terekesinden irsle bana isâbet eden iki sehim hisse-i şer‘iyyem mukābelesinde kezâlik bi tarîki’l-müsâlaha tehârüc-i şer‘î tarîki üzre vasiyy-i merkūm Mustafa yedinden iki bin altı yüz altmış yedi akçe ahz ve kabz eyledim. Tereke-i mezbûrede kat‘â alâkam kalmadı. Ba‘de’l-yevm benden veya vekîlimden tereke-i merkūma müte‘allika da‘vâ sâdıra olursa lede’l-hükkâm mesmû‘a olmasın dedikde, mukırrân-ı merkūmânın ber vech-i meşrûh sudûr eden ikrârlarını vasiyy-i mezbûr Mustafa bi’l-müşâfehe vesâyeten tasdîk etmeğin, mâ-vaka‘a bi’t-taleb ketb ve tahrîr olundu. Tahrîren fî evâhiri şehri Rebî‘ilâhir li sene selâse ve ışrîn ve elf. Şuhûdü’l-hâl: Mehmed Çelebi b. Mahmud el-İmâm, Hasan Halîfe b. Abdi el-İmâm, Ahmed b. İbrahim el-Kâtib, Ali Bey b. Mustafa el-Cündî, Sefer Çelebi b. İsmail yorgancı ve gayruhüm.