Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 651 Hüküm no: 833 Orijinal metin no: [100b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sehergâh bt. Abdullah’ın kocasından intikal eden vakıf evin yarım hissesini mütevelli izni ile Mahmud Çelebi b. Receb’e sattığı Mahmiye-i İstanbul’da Emin Sinan mahallesinde sâkin iken bundan akdem fevt olan Mustafa b. Mehmed nâm kimesnenin zevcesi Sehergâh bt. Abdullah nâm hâtun meclis-i şer‘-i şerîf-i lâzımü’t-teşrîfde işbu bâ‘isü’l-kitâb Mahmud Çelebi b. Receb nâm kimesne mahzarında ikrâr ve takrîr-i kelâm edip merhûme Nesli Hâtun vakfı’ndan mahalle-i mezbûrede vâki‘ bir tarafdan Mustafa Çelebi b. Bayram mülkü ve bir tarafdan Halil Ağa mülkü ve bir tarafdan tarîk-i hâs ile mahdûd bir bâb fevkānî ve bir bâb tahtânî odayı ve kenîfi müştemil olup icâre-i mu‘accele-i ma‘lûme ve ayda yirmişer akçe icâre-i müeccelesi olan menzilin nısf-ı şâyi‘i benim tasarrufumda ve nısf-ı şâyi‘-i âharı müteveffâ-yı mezbûrun sulbî sagīr oğulları İsmail ve Ahmed’in tasarruflarında olup menzil-i mezbûrun benim tasarrufumda olan nısf hisse-i şâyi‘amı vakf-ı mezbûr mütevellîsi izniyle dört bin beş yüz akçe bedel mukābelesinde mezbûr Mahmud Çelebi’ye ferâğ ve tefvîz ol dahi kabz ve kabûl ettikden sonra meblağ-ı mezbûr dört bin beş yüz akçeyi mezbûr Mahmud Çelebi yedinden tamâmen ahz u kabz edip min ba‘d menzil-i mezbûrun nısf-ı şâyi‘i mezbûr Mahmud Çelebi’nin hakkı müfevvazıdır emsâli gibi mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mustafa Efendi el-İmâm, Yahya Efendi el-Müezzin, el-Hâc Receb b. ( ), Hasan b. ( ), Mustafa b. Bayram.