Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 651 Hüküm no: 834 Orijinal metin no: [100b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Abdullah’ın tülbent bahasından İbrahim Çelebi b. Ahmed’e borçlu olduğu, vekile Mehmed Çelebi b. Abdullah’a borcu ödemesi Mahmiye-i İstanbul’da Nevbahar mahallesi sükkânından râfi‘ü’l-kitâb Mehmed Çelebi b. Abdullah nâm kimesne meclis-i şer‘-i Ahmedî ve mahfil-i dîn-i münîf-i Muhammedî’de Hasan Beşe b. Abdullah nâm kimesne mahzarında üzerine da‘vâ ve takrîr-i kelâm edip gāib ani’l-meclis İbrahim Çelebi b. Ahmed nâm kimesne tülbent bahâsından merkūm Hasan Beşe zimmetinde hakkı olan on esedî guruşu mezbûr Hasan Beşe’den ahz u kabza ve kendiye îsâle bin yetmiş yedi senesi şehr-i Şa‘bânı’nın onuncu gününe mu‘allaka vekâlet ile mukaddemâ beni vekîl edip târih-i kitâb günü olan işbu yevm-i Cum‘a şehr-i mezbûrun onuncu günü olmağla suâl olunup vekâletime binâen meblağ-ı mezbûru bana edâ ve teslîme mezbûr Hasan Beşe’ye tenbîh olunmak matlûbumdur dedikde gıbbe’s-suâl mezbûr Hasan Beşe cihet-i mezbûreden merkūm İbrahim Çelebi’ye on guruş deyni olduğu ve müdde‘î-i mezbûrun vech-i muharrer üzre vekâletini ikrâr lâkin yevm-i mezbûr şehr-i mezbûrun onuncu günü olduğunu inkâr etmeğin müdde‘î-i mezbûrdan müdde‘âsını mübeyyine beyyine taleb olundukda merhûm ve mağfûrun leh Ebü’l-feth Sultan Mehmed Hân aleyhi’r-rahmetü ve’l-gufrân hazretlerinin mahmiye-i mezbûrda vâki‘ câmi‘-i şerîfi ve ma‘bed-i latîfi kurbunda binâ buyurdukları Medâris-i semâniye’den Akdeniz tarafında Çifteayak medresesi’nde sâkin Ahmed Efendi b. İbrahim ve Ömer Efendi b. Ali nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka sene-i mezbûre Cemâziyelâhiresi’nin selhi olan pazar günü ba‘de’l-mağrib câmi‘-i mezbûrun zikr olunan medrese tarafında vâki‘ nerdübânı başında olan sofa üzerinden hilâl-i şehr-i Receb’i ayânen biz görmüş idik selh-i mezbûrdan târih-i kitâb günü olan yevm-i Cum‘a’ya gelince kırk gün olmuştur, sene-i mezbûre Recebi’nin gurresi Pazartesi olup tamâmen otuz gün olduğu takdîrce târih-i kitâb günü olan yevm-i cum‘a sene-i mezbûre Şa‘bânı’nın onuncu günü olduğuna şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup mûcebince sene-i mezbûre Recebi’nin gurresi Pazartesi ve târih-i kitâb günü olan yevm-i Cum‘a sene-i mezbûre Şa‘bânı’nın onuncu günü olduğuna ba‘de’l-hükm meblağ-ı mezbûru müdde‘î-i mezbûra edâ ve teslîme mezbûr Hasan Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-Cum‘a el-âşir min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Fahrü’l-eşbâh Eyüb Ağa b. Ahmed, Fahrü’n-nüvvâb Ahmed Efendi el-Keşşâf, Şaban Ağa b. Süleyman Ser-muhzırân, İbrahim Efendi b. eş-Şeyh Hızır, Hasan Beşe b. Abdullah, İbrahim Çelebi b. Mehmed.