Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 88 Hüküm no: 73 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi’nin ölen babası Mehmed Ağa b. Abdülmennân’da olan alacağının terekesinden tahsil olunması Mahmiye-i Galata müzâfâtından Beşiktaş mahallesinde sâkin iken vefât eden Mehmed Ağa b. Abdülmennân’ın sulbî kebîr oğlu Ali Çelebi meclis-i şer‘-i şerîfde, müteveffâ-yı mezbûrun sulbî sagīr oğlu Derviş’in tesviye-i umûruna vasiyy-i muhtârı ve vesâyeti hasebiyle muhallefâtına vaz‘-ı yed edip, bimâ hüve tarîkü’s-sübût şer‘an vesâyeti sâbite olan Hüseyin Çelebi b. Behram ve yine müteveffâ-yı mezbûrun zevce-i metrûkesi Âişe Hâtun bt. Rıdvan tarafından husûs-ı âti’l-beyânın istimâ‘ına vekîl olup, nehc-i şer‘î üzre vekâleti sâbite olan el-Hâc Cafer Bey b. el-Hâc Mehmed mahzarlarında üzerlerine takrîr-i da‘vâ edip, Üsküdar’a tâbi‘ Kaymas nâhiyesinde sâkin iken vefât eden Yunus mukaddemâ vefât eden vâlidem Emine bt. Abdullah’ın mu‘tekası Zamâne bt. Abdullah’ın sadrî oğlu olup usûbet-i nesebiyye tarîki ile verâseti bana münhasıra olmağın, ben sagīre olmağla babam müteveffâ-yı mezbûr Mehmed Ağa müteveffâ-yı merkūm Yunus’dan bana intikāl eden metrûkâtdan otuz bir bin yetmiş akçelik esbâb kabz etmiş idi. Mukaddemâ zikr olunan otuz bir bin yetmiş akçelik esbâbdan bin iki yüz akçe kıymetli bir bilezik ve iki bin beş yüz akçe kıymetli bir istefan ve üç yüz akçe kıymetli bir hâtem cem‘an dört bin akçelik şey kabz edip, bâkī babam müteveffâ-yı mezbûr Mehmed Ağa zimmetinde yirmi yedi bin akçelik hakkım bâkī kaldı. Metrûkâtından da‘vâ ve taleb ederin suâl olunsun dedikde, gıbbe’s-suâl ve akībe’l-inkâr, müdde‘î-i merkūm Ali Çelebi’den sıdk-ı makāline beyyine taleb olundukda, udûl-i müslimîn ve sikāt-i muvahhidînden mahalle-i mezbûre sükkânından fahrü’l-eimme Receb Halîfe b. Ârif ve Kurd Çelebi b. Mustafa meclis-i şer‘-i şerîfe hâzırân olup, fi’l-hakīka müteveffâ-yı mezbûr Mehmed Ağa merkūme Zamâne’nin oğlu müteveffâ-yı mezbûr Yunus’dan minvâl-i meşrûh üzre müdde‘î-i mezbûr Ali Çelebi’ye irs-i şer‘î ile intikāl eden metrûkâtdan velâyeti hasebiyle otuz bir bin yetmiş akçelik esbâb kabz eyledi. Biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, şehâdetleri ba‘de’t-ta‘dîl ve’t-tezkiyye hayyiz-i kabûlde vâki‘ oldukdan sonra [29a] müdde‘î-i merkūm Ali Çelebi’ye makbûzu olan sâlifü’z-zikr dört bin akçelik esbâbdan gayrı esbâbdan ve akçeden müteveffâ-yı mezbûrun hayâtında ve vefâtından sonra bir şeyi ahz ve kabz etmediğine ve bi’l-cümle turûk-ı şer‘iyyeden bir tarîk ile babası müteveffâ-yı mezbûr Mehmed Ağa’nın zimmetini ibrâ etmediğine yemîn teklîf olunup, ol dahi yemîn billâhi’l-aliyyi’l-a‘lâ etmeğin meblağ-ı merkūm yirmi yedi bin akçeyi muhallefât-ı merkūmeden edâya mezbûrlara tenbîh birle, bu vesîka alâ mâ hüve’l-hakīka ketb ve tahrîr olunup, yed-i tâlibe vaz‘ ve def‘ olundu. Tahrîren fî evâili Cumâdelâhire li sene selâse ve ışrîn ve elf. Şuhûdü’l-hâl: Hüseyin Çelebi b. Sinan, Murad b. Abdullah, Ahmed b. Keyvan, el-Hâc Rıdvan b. Abdullah, Memi Ağa b. Abdullah, el-Hâc Mustafa b. Murad, Mevlânâ Ahmed Efendi el-Kâtib, Abdülkādir Efendi b. Abdünnebi, Mehmed el-Muhzır ve gayruhüm.