Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 652 Hüküm no: 835 Orijinal metin no: [100b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yanaki v. Mihal’in, üzüm bahasından Manaysa v. İlya’dan alacaklı olduğu Mahrûse-i Üsküdar’a tâbi‘ Kadıköyü nâm karye ahâlîsinden bâ‘isü’l-kitâb Yanaki v. Mihal v. ( ) nâm zimmî dîvân-ı kāimmakām-ı sadr-ı a‘zamîde akd olunan meclis-i şer‘de Zeytun cemâ‘atinden Menasya v. İlya nâm Yahudi mahzarında üzerine da‘vâ ve takrîr-i kelâm edip karye-i mezbûrda vakı‘a Ahmed Paşa bağı demekle ma‘rûf bağın bin altmış beş senesinde salâhı zâhir olan üzümünü mâliki Ahmed Ağa nâm kimesneden on altı bin akçeye iştirâ ve kabz ettiğimden sonra on iki bin beş yüz akçesini bana edâ ve teslîm edip bâkī üç bin beş yüz akçesi zimmetinde kalmağın suâl olunup alıverilmek matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda karye-i mezbûre sükkânından Zerkari v. İstemad nâm [zimmî] ile fi’l-asl mahrûse-i mezbûrda Bâb mahallesi kurbunda sâkin olup hâlâ Karaköy’de sâkin Kazancıoğlu demekle şehîr Mehmed b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr zikr olunan bağın sene-i mezbûrda salâhı zâhir olan üzümünü mâliki mezbûr Ahmed Ağa’dan on altı bin akçeye iştirâ [101a] ve kabz ettiğinden sonra on altı bin akçeye mezbûr Menasya’ya bey‘ ve teslîm ol dahi iştirâ ve tesellüm ve kabûl etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince meblağ-ı mezbûr üç bin beş yüz akçeyi müdde‘î-i mezbûra edâya merkūm Menasya’ya tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü erbâbi’t-tahrîr ve’l-kalem Ebûbekir Efendi b. ( ) Tezkireci-i evvel, mefharü erbâbi’t-tahrîr ve’l-kalem Mustafa Efendi Tezkireci-i sânî, umdetü’l-a‘yân İsmail Ağa Serçavûşân, zahrü’l-emsâl Şaban Ser-muhzırân.