Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 653 Hüküm no: 836 Orijinal metin no: [101a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hatun’un İbrahim Efendi b. Mehmed’e sattığı ev için Musli Paşa’nın şüf‘a talep etmesi Havâss-ı aliyye kazâsı müzâfâtından kasaba-i Hasköy’de Turşucu mahallesinde sâkin düstûr-ı mükerrem müşîr-i müfahham vezîr-i rûşen-zamîr bâ‘isü’l-kitâb Musli Paşa meclis-i şer‘-i şerîf-i Ahmedî ve mahfil-i dîn-i münîf-i Muhammedî’de İbrahim Efendi b. Mehmed nâm kimesne mahzarında üzerine da‘vâ ve takrîr-i kelâm edip bundan akdem Âişe nâm hâtun arsa ve binâsı mülkü olup mahmiye-i İstanbul’da Kapıağası mahallesinde vâki‘ bir tarafdan kezâlik merkūm İbrahim’in menzili ve bir tarafdan Abdülkerim Efendi nâm kimesnenin mülk menziline muttasıl menzilini mezbûr İbrahim Efendi’ye bin iki yüz esedî guruşa bey‘ ve teslîm ve kabz-ı semen edip mezbûr İbrahim Efendi dahi iştirâ ve tesellüm ettiğini târih-i kitâbdan on iki gün mukaddem Pazar günü kuşluk vaktinde kasaba-i mezbûrda sâkin olduğum menzilimde istimâ‘ ettiğimde bilâ-te’hîr taleb-i müvâsebe edip mezbûr İbrahim Efendi yanında taleb-i işhâd için tevâbi‘inden Halil Bey b. Bâli nâm kimesneyi tevkîl ve irsâl edip ol dahi mezbûr İbrahim Efendi’nin menziline varıp merkūm İbrahim Efendi üzerine taleb-i işhâd etmişidi suâl olunup ihkāk-ı hak olunmak matlûbumdur dedikde gıbbe’s-suâl merkūm İbrahim Efendi cevâbında menzil-i mezbûru semen-i merkūma iştirâ ve kabz ettiğimden sonra yevm-i mezbûrda mûmâ-ileyh Musli Paşa taleb-i müvâsebe ve vekîli mezbûr Halil Bey dahi benim üzerime taleb-i işhâd etmişdi, lâkin mûmâ-ileyh Musli Paşa bey‘-i mezbûru yevm-i mezbûrdan üç gün mukaddem istimâ‘ edip sükût etmekle şuf‘ası bâtıl olmuşdur deyû def‘le mukābele edicek gıbbe’s-suâl ve’l-inkâr mezbûr İbrahim Efendi’den def‘-i mezbûrunu mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mûmâ-ileyh Musli Paşa’ya bey‘-i mezbûru yevm-i mezbûrdan mukaddem istimâ‘ ve sükût etmeyip bu vechile ibtâl-i şuf‘a etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Şaban Ağa b. Süleyman Ser-muhzırân, Eyüb Ağa b. ( ) Kethüdâ-yı hazret-i efendi, Mehmed Çelebi b. Abdullah Kethüdâ-yı muhzırân, İbrahim Çelebi b. Mehmed.