Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 108 Hüküm no: 102 Orijinal metin no: [36b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâkine Hatun bt. Seyyid Farzüddin’in Hüseyin Beşe b. Cafer’den hakkını alması Mahmiye-i Galata müzâfâtından kasaba-i Beşiktaş’da Sinan Paşa mahallesinde sâkin iken vefât eden Mumcu Mehmed Beşe b. Abdullah nâm yeniçerinin zevce-i metrûkesi Sâkine Hâtun bt. es-Seyyid Farzüddin meclis-i şer‘-i şerîfde, müteveffâ-yı mezbûrun odabaşısı ve sagīr sulbî oğlu Mahmud’un vasiyy-i şer‘îsi olup, vesâyeti hasebiyle muhallefâtına vaz‘-ı yed eden fahrü’r-râcilîn Hüseyin Beşe b. Cafer mahzarında takrîr-i kelâm edip, müteveffâ-yı mezbûrun terekesinden bana âid olan dokuz yüz yetmiş iki akçe sümün hisse-i şer‘iyyemi ve zimmetinde olan dört bin akçe mehr-i müeccelimi ve beynimizde ma‘lûme câriye bahâsından üç bin altı yüz akçe hakkımı mezbûr Hüseyin Beşe yedinden bi’t-tamâm ve’l-kemâl ahz ve kabz edip, muhallefât-ı merkūmede min ba‘d alâkam kalmadı. Ba‘de’l-yevm benden veya vekîlimden husûs-ı mezbûra müte‘allik da‘vâ sudûr ederse, lede’l-hükkâmi’l-kirâm mesmû‘a olmaya deyû ikrâr ve i‘tirâf ettikde, mukırre-i merkūme Sâkine’nin ber vech-i meşrûh sudûr eden ikrârın vasiyy-i mezbûr Hüseyin Beşe vicâhen tasdîk etmeğin, mâ-vaka‘a gıbbe’t-taleb ketb ve tahrîr olunup yed-i tâlibe vaz‘ ve def‘ olundu. Tahrîren fî evâsıtı Recebi’l-mürecceb li sene selâse ve ışrîn ve elf. Şuhûdü’l-hâl: Rıdvan Beşe b. Abdullah er-Râcil, Mahmud Beşe b. Abdullah er-Râcil, Hüseyin Beşe b. Abdullah er-Râcil, Mehmed Beşe b. Abdullah er-Râcil, Ahmed Beşe b. Abdullah er-Râcil, Mehmed Beşe b. Abdullah er-Râcil, Ahmed Beşe b. Durak er-Râcil, Mehmed Beşe b. Ahmed er-Râcil, Hüseyin b. Abdullah er-Râcil, Hakkı b. Mehmed, el-Hâc Yusuf b. Abdullah ve gayruhüm mine’l-hâzırîn.