Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 111 Hüküm no: 105 Orijinal metin no: [37a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nisâ bt. Mehmed’in Davud Çavuş b. Abdullah’tan miras hakkını alması Hâric-i Galata’da Tophâne’de İlyas Çelebi mahallesinde sâkine iken vefât eden Kerime bt. Süleyman nâm müteveffânın vâlidesi Nisâ bt. Mehmed nâm hâtun meclis-i şer‘-i şerîfde, müteveffâ-yı mezbûre Kerime’nin zevci ve sagīr oğlu Süleyman’ın babası ve vasiyy-i şer‘îsi olup, vesâyet ve velâyeti ciheti ile [37b] muhallefâtına vaz‘-ı yed eden fahrü’l-âbidîn Davud Çavuş b. Abdullah mahzarında takrîr-i kelâm edip, müteveffât-ı mezbûre Kerime’nin zevci mezbûr Davud Çavuş zimmetinde olan yedi bin altı yüz akçe mehr-i mu‘accelinden ve on bin akçe mehr-i müeccelinden ve bi’l-cümle mezbûrun makbûzu olan cümle muhallefâtından bi hasebi’l-irsi’ş-şer‘î bana âid olan altı bin yedi yüz altmış yedi akçe südüs hisse-i şer‘iyyemi, vasiyy-i mezbûr Davud Çavuş yedinden bi’t-tamâm ve’l-kemâl alıp kabz edip, muhallefât-ı mezbûreden bana âid mezbûrun yedinde bir akçe ve bir habbe bâkī kalmadı. Ba‘de’l-yevm bi’z-zât veya bi’l-vâsıta husûs-ı mezbûru müte‘allik benden da‘vâ sâdır olursa, lede’l-hükkâmi’l-kirâm mesmû‘a ve makbûle olmasın deyû ikrâr ve i‘tirâf ettikde, mukırre-i merkūme Nisâ’nın ber vech-i meşrûh sudûr eden ikrârın merkūm Davud Çavuş vicâhen tasdîk etmeğin, mâ-vaka‘a bi’t-taleb ketb olundu. Tahrîren fî evâhiri Recebi’l-mürecceb li sene selâse ve ışrîn ve elf. Şuhûdü’l-hâl: Mehmed Halîfe b. Nuh el-İmâm, Musa Halîfe b. İbrahim el-Müezzin, Mustafa Bey b. İbrahim el-Bevvâbü’s-sultânî, Mustafa el-Muhzır ve gayruhüm mine’l-hâzırîn.