Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 111 Hüküm no: 106 Orijinal metin no: [37b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nisâ bt. Mehmed’in Davud Çavuş b. Abdullah’tan alacaklı olması Hâric-i Galata’da Tophâne’de İlyas Çelebi mahallesi sâkinelerinden Nisâ bt. Mehmed nâm hâtun meclis-i şer‘de sâbıkan vefât eden kızı Kerime bt. Süleyman’ın zevc-i metrûkü fahrü’l-kā’idîn Davud Çavuş b. Abdullah mahzarında üzerine takrîr-i da‘vâ edip, karz-ı şer‘îden mezbûr Davud Çavuş’un zimmetinde olan on beş sikke-i hasene ile yedi yüz akçe hakkımı ve ıslâh ettirmek için verdiğim otuz yedi miskāl altın bileziğimi taleb ettiğimde, vermede ta‘allül eder suâl olunsun dedikde, gıbbe’s-suâl ve akībe’l-inkâr, müdde‘iye-i merkūme Nisâ’dan sıdk-ı makāline beyyine taleb olundukda, ityân-ı beyyineden âcize ve kāsıra olup talebi ile mezbûr Davud Çavuş’a meblağ-ı merkūm on beş sikke-i hasene ve yedi yüz akçe zimmetinde olmadığına ve zikr olunan bileziği dahi minvâl-i meşrûh üzre almadığına yemîn teklîf olunup, ol dahi yemîn billâhi’l-aliyyi’l-a‘lâ etmeğin, bu vesîka alâ mâ hüve’l-hakīka ketb ve tahrîr olunup, yed-i tâlibe vaz‘ ve def‘ olundu. Tahrîren fî evâhiri Recebi’l-mürecceb li sene selâse ve ışrîn ve elf. Şuhûdü’l-hâl: es-Sâbikūn.