Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 123 Hüküm no: 123 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Halife b. Haydar’ın dükkân, bağ ve kiremit fırınındaki miras hissesini Kasım Efendi b. Ayetullah’a satması Medîne-i hazret-i Ebî Eyyûb el-Ensârî -radiye anhu Rabbühü’l-Bârî- müzâfâtından Hasköy mahallâtından Turşucuzâde mahallesi sükkânından Mehmed Halîfe b. Haydar meclis-i şer‘-i şerîfde a‘lemü’l-ulemâ’i’l-mütebahhirîn efdalü’l-fuzalâ’i’l-müdakkikīn mahmiye-i İstanbul’da merhûm Pîr[î] Mehmed Paşa medresesinde bi’l-fi‘l müderris olan Kasım Efendi b. Ayetullah mahzarında takrîr-i kelâm edip, verâseti bana ve vâlidesi Fâtıma bt. Ahmed ve li üm kız karındaşı Râbia bt. Hasan’a inhisâr üzre vefât eden Âişe bt. Mustafa nâm müteveffânın terekesinden mahalle-i mezbûrede vâki, hudûdunun bir tarafı bahre ve üç tarafı müşârün-ileyh Kasım Efendi tasarrufunda olan kiremid fırınının harman yerlerine ve çamurluğuna müntehî olup, iki bâb dükkânı ve pereme yerini muhtevî olan buzhâneden bana intikāl eden nısf hisse-i şâyi‘amı on iki bin beş yüz akçeye ve yine müteveffât-ı mezbûrenin terekesinden Abdüsselâm mahallesi kurbunda vâki‘ inde’l-[ahâlî ve’l-]cîrân ma‘lûmü’l-hudûd iki kıt‘a bağdan bana intikāl eden nısf hisse-i şâyi‘amı üç bin beş yüz akçeye ve yine zikr olunan kiremid fırınında olan sekiz bin yetmiş kiremidden ve iki bin üç yüz ham tuğladan ve kırk dört bin pişmiş tuğladan [42a] ve dört ocak-ı toprakdan ve fırın içinde olan sâir hırdavâtdan ve peremeden nısf hissemi, yirmi iki bin altı yüz doksan dokuz akçeye mûmâ-ileyh Kasım Efendi’ye bey‘-i bâtt-ı sahîh-i şer‘î ile bey‘ edip, semen-i mezbûr otuz sekiz bin altı yüz doksan dokuz akçeyi müteveffât-ı mezbûre Âişe’nin müşârün-ileyh Kasım Efendi’de olan doksan bin akçe deyninin otuz sekiz bin altı yüz doksan dokuz akçesine mukāssa eyledik. Min ba‘d zikr olunan eşyânın nısfı mûmâ-ileyh efendinin mülk-i müşterâsıdır deyû ikrâr ve i‘tirâf ettikde, mukırr-ı merkūm Mehmed Halîfe’nin ber vech-i meşrûh sudûr eden ikrârını müşârün-ileyh Kasım Efendi vicâhen tasdîk ve şifâhen tahkīk etmeğin, mâ-vaka‘a bi’t-taleb ketb olundu. Tahrîren fî gurreti şehri Ramazâni’l-mübârek li sene selâse ve ışrîn ve elf. Şuhûdü’l-hâl: Fahrü’l-kuzât Mustafa Efendi b. Musa, fahrü’l-müderrisîn Hızır Efendi b. Mehmed el-Müderris, fahrü’l-müsta‘idîn Mehmed Çelebi b. Receb el-Müsta‘cim, fahrü’l-mehâdîmi’l-kirâm Mustafa Çelebi b. Mehmed eş-şehîr bi Vucûdî?, Mustafa b. Mehmed el-Muhzır, İbrahim Efendi b. Aydın el-Kadı.