Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 128 Hüküm no: 130 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Kapudân b. Abdülmennân’ın vasiyyetini icra etmek üzre damadı Süleyman Çelebi b. Musa Bey’i vasî tayin etmesi Mahmiye-i Galata mahallâtından Câmi‘-i Kebîr mahallesinden fahrü’l-a‘yân Süleyman Çelebi b. Musa Bey mahfil-i kazâda Tersâne-i âmire kapudânlarından olup bundan akdem Donanma-yı hümâyûn seferinde Koron nâm kasabada vefât eden merhûm Hasan Kapudân b. Abdülmennân nâm kimesnenin sulbî kebîr oğlu Mehmed Çelebi mahzarında takrîr-i kelâm ve ta‘bîr ani’l-merâm kılıp, müteveffâ-yı müşârün-ileyh Hasan Kapudân merhûm vesâyâ-yı şer‘iyyesi nâfize ve teberru‘ât-ı mer‘iyyesi câriye ve mu‘tebere olduğu hâlde hâlis kendi malından otuz bin fıddî-i Osmâ[nî] akçe vasiyyet edip, meblağ-ı mezbûr otuz bin akçe techîz ve tekfînime ve hîn-i fevtimde mühimmât-ı lâzımem ve üçümde ve yedimde ve kırkımda it‘âm-ı ta‘âm ve tasadduk-ı erâmil u eytâm ve mahal olan fukarâya bezl u sarf olunup ve bu tafsîl üzre vasiyyetin tenfîzine beni vasî ihtiyâr edip, vasiyyet-i merkūm üzerine musırran fevt olmuşdur. Hâlâ vasiyyet-i merkūm üzerine malı dahi müsâ‘iddir, vesâyetim hasebiyle meblağ-ı mezbûr terekesinden ihrâc olunup tenfîz olunmasın taleb ederim dedikde, gıbbe’s-suâl mezbûr Mehmed Çelebi vasiyyet-i merkūmeyi münkir olmağın, mezbûr Süleyman Çelebi’den da‘vâsına muvâfıka beyyine taleb olundukda, udûl-i müslimîn ve sikāt-ı muvahhidînden Cafer Reis b. Abdullah ve Ramazan Reis b. Abdülmennân nâm kimesneler meclis-i şer‘a li ecli’ş-şehâde hâzırân olup, fi’l-hakīka müteveffâ-yı mûmâ-ileyh Hasan Kapudân vesâyâ-yı şer‘iyyesi nâfize olduğu hâlde kendi hâlis malından otuz bin fıddî-i Osmânî akçe vasiyyet edip, meblağ techîz ve tekfînime ve yevm-i mezbûrda mühimmât-ı lâzımeme ve üçümde ve yedimde ve kırkımda ve yılımda it‘âm-ı ta‘âm ve tasadduk-ı erâmil u eytâm ve mahal olan fukarâya bezl u sarf olunup ve bu tafsîl üzre vasiyyetin tenfîzine dâmâdı mezbûr Süleyman Çelebi’yi bizim huzûrumuzda vasî ihtiyâr edip, vasiyyet-i merkūm üzerine musırran fevt oldu. Bu husûsa şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiyye şehâdetleri makbûle oldukdan sonra mûcebi ile hükm olunup, mâ-vaka‘a ketb olundu. Tahrîren fî evâhiri şehri Şevvâl li sene selâse ve ışrîn ve elf. Şuhûdü’l-hâl: Ömer Efendi el-Mülâzım, Memi Reis b. Abdullah, Hızır Kapudân-ı Tersâne-i âmire, İbrahim Çelebi b. ( ) el-Bevvâbü’s-sultânî, Mehmed Bey b. Cafer ve gayruhüm.