Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 657 Hüküm no: 842 Orijinal metin no: [101b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anna bt. İstifan’ın, evdeki dörtte birlik hissenin yarısını kocası Dimitri v. Rali’ye sattığı Mahmiye-i İstanbul’da Mirahor mahallesinde sâkine Anna bt. İstifan nâm nasrâniye tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iyye ile ârifân olan Bakar v. Yorgi ve Drako v. Yani nâm zimmîler şehâdetleri ile şer‘an sâbit olan babası mezbûr İstifan meclis-i şer‘-i hatîrde mezbûrenin zevci bâ‘isü’l-kitâb Dimitri v. Rali nâm zimmî muvâcehesinde bi’l-vekâle ikrâr ve takrîr-i kelâm edip mahalle-i mezkûrede vâki‘ bir tarafdan Dorani nâm zimmî mülkü ve bir tarafdan Tagara nâm nasrâniye mülkü ve bir tarafdan Biram v. Toran nâm zimmî mülkü ve bir tarafdan tarîk-i âm ile mahdûd tabaka-i selâseyi muhtevî olup tabaka-i ulyâsı iki bâb oda ve bir sofa ve tabaka-i vustâsı iki bâb oda ve tabaka-i süflâsı ahır ve bir su kuyusu ve kenîf ve hadîkayı müştemil mülk menzilin rub‘u müvekkilem mezbûre Anna’nın ve selâse erbâ‘ı zevci merkūm Dimitri’nin mülkü olup hâlâ müvekkilem mezbûre vech-i muharrer üzre menzil-i mahdûd-ı mezbûrda olan rub‘ hissesinin nısfını cümle hukūk ve merâfıkı ile zevci merkūm Dimitri’ye yedi bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl eyledikden sonra semeni olan meblağ-ı mezbûr yedi bin beş yüz akçeyi müvekkilem mezbûre Anna zevci merkūm Dimitri’ye hibe-i sahîha-i şer‘iyye ile hibe ve temlîk edip ol dahi ittihâb ve kabûl etti, ba‘de’l-yevm menzil-i mahdûd-ı mezbûrda müvekkilem mezbûrenin vech-i muharrer üzre rub‘ hissesinin nısfı zevci merkūm Dimitri’nin mülkü olup keyfe mâ yeşâ’ ve yahtâr tasarruf eylesin dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Sefer, Hasan Çelebi b. Ahmed, Mehmed b. Ramazan.