Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 144 Hüküm no: 154 Orijinal metin no: [53a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Abdülmennân’ın vârislerinin gemi hisselerini Manol v. Franko’ya sattıkları Mahmiye-i Galata müzâfâtından kasaba-i İstinye mahallâtından Kürkçübaşı mahallesi sâkinlerinden olup, bundan akdem fevt olan Mustafa Beşe b. Abdülmennân nâm râcilin zevce-i metrûkesi olup sulbiye sagīre kızı Âişe’ye kıbel-i şer‘den vasî nasb olunan Mümine bt. Murad nâm hâtun tarafından husûs-ı âti’z-zikre vekîl olup, hasm-ı şer‘-i câhid mahzarında mezbûre Mümine’yi ma‘rifet-i şer‘iyye ile ârifeyn olan Osman Bey b. Abdullah ve diğer Osman Efendi b. el-Hâc Pîrî şehâdetleriyle vekâleti sâbite olan oğlu Mustafa b. Abdullah nâm kimesne vekâleten [53b] ve Ömer Beşe b. Abdullah asâleten mahfil-i kazâda, hâmilü’l-kitâb Manol v. Franko nâm zimmî mahzarında vekâleten ve asâleten ikrâr ve takrîr-i kelâm edip, şayka demekle ma‘rûf müteveffâ-yı mezbûr ile bi tarîki’l-münâsafa ber vech-i iştirâk tasarruf olunan on yedi zirâ‘ sefîneyi ba‘de’l-arz ale’t-tâlibîn ve gıbbe inkıtâ‘i rağbeti’r-râgıbîn mezbûr Manol’e yirmi sekiz bin beş yüz nakid fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip, teslîm-i mebî‘ ve kabz-ı semen eyledik, sefîne-i sâlifü’z-zikr merkūm Manol’ün mülk-i müşterâsıdır, keyfe mâ yeşâ’ tasarruf eylesin dediklerinde, mâ-vaka‘a ketb olundu. Tahrîren fî evâili Zilka‘deti’ş-şerîfe li sene selâse ve ışrîn ve elf. Şuhûdü’l-hâl: Osman Efendi b. el-Hâc Bayram, İbrahim Halîfe b. Mustafa el-İmâm, Mustafa Halîfe b. Hasan el-İmâm, Hasan Çavuş b. Abdullah, Osman Bey b. Abdullah ve gayruhüm.