Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 658 Hüküm no: 843 Orijinal metin no: [101b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Ahmed’in, evini Abdurrahman Efendi b. Osman Efendi’ye sattığı Mahmiye-i İstanbul’da Tahtaminâre mahallesi sâkinelerinden Âişe bt. Ahmed nâm hâtun mahfil-i kazâda işbu bâ‘isü’l-kitâb Abdurrahman Efendi b. Osman Efendi mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Sultan vakfı ve bir tarafdan Çelebi Hamza mülkü ve iki tarafdan tarîk-i âm ile mahdûd tahtânî iki bâb oda ve bi’r-i mâ ve cüneyne ve havluyu müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık‘ mezbûr Abdurrahman Efendi’ye bey‘ bi’l-vefâ ile yüz on esedî guruşa bey‘ ve teslîm ol dahi iştirâ ve kabûl ve kabz ve tesellüm eyledikden sonra meblağ-ı mezbûr yüz on dört esedî guruşu yedinden tamâmen ahz u kabz edip târih-i kitâbdan yüz bir gün tamâmına değin meblağ-ı mezbûr yüz on dört esedî guruşu mezbûr Abdurrahman Efendi’ye teslîm eylemezsem bey‘-i mezbûr bâtta münkalib olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Ahmed Ağa b. Abdurrahman, Osman Çelebi b. Ali, helvacı Ali Bey, müezzin Ebûbekir.