Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 155 Hüküm no: 167 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dâye Hatun bt. Abdullah’ın ölen kocası Şaban Reis b. Abdullah’daki mehir alacağının muhallefatından ödenmesi Mahmiye-i Galata tevâbi‘inden kasaba-i Beşiktaş mahallâtından Yahya Efendi mahallesi sâkinlerinden olup bundan akdem fevt olan Şaban Reis b. Abdullah nâm kimesnenin zevce-i metrûke[si] olan Dâye Hâtun bt. Abdullah meclis-i şer‘-i şerîfde, müteveffâ-yı mezbûrun mevlâsı oğlu min ciheti’l-usûbeti’n-nesebiyye vârisi olan Mustafa b. Mustafa nâm sagīre kıbel-i şer‘-i şerîfden vasî nasb olunan Mehmed b. Abdullah mahzarında takrîr-i da‘vâ edip, müteveffâ-yı [mezbûr] zevcim Şaban Reis zimmetinde mehr-i müeccelimden dört bin akçe hakkım vardır, şer‘le suâl olunup muhallefâtından taleb ederim dedikde, gıbbe’s-suâl vasiyy-i mezbûr inkârıyla cevâb vermeğin, müdde‘iye-i mezbûreden da‘vâsına mutâbık beyyine taleb olundukda, udûl-i müslimînden Kadri Efendi b. Abdünnebi ve Cafer Bey b. Abdullah nâm kimesneler meclis-i şer‘a li ecli’ş-şehâde hâzırân olup, fi’l-hakīka mezbûre Dâye Hâtun’a mehr-i müeccelinden müteveffâ-yı mezbûr Şaban Reis’in dört bin akçe zimmetinde kalıp ma‘lûmumuzdur dediklerinde, şâhidân-ı mezbûrânın şehâdetleri hayyiz-i kabûlde vâkı‘a oldukdan sonra mezbûre Dâye Hâtun gıbbe’l-istihlâf mehr-i müeccelinden bir akçe hibe ve taraf-ı şer‘iyyeden bir tarîk ile zimmetini ibrâ etmediğine yemîn billâhi etmeğin, mâ-vaka‘a gıbbe’t-taleb ketb [olundu]. Şuhûdü’l-hâl: Murad Ağa b. Abdullah, Rıdvan b. Abdullah er-Râcil, Ali Bey [b.] Abdullah, Ahmed b. Süleyman ve gayruhüm.