Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 658 Hüküm no: 844 Orijinal metin no: [101b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdülkādir Efendi’nin, İsak v. Avraham’daki şişehane kirası bedeli ile ilgili davada sulh olduğu Mahmiye-i İstanbul’da Hobyar mahallesi sâkinelerinden Sâliha bt. Abdülkādir Efendi nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Hürrem Çavuş b. İlyas ve Hüseyin b. Mehmed nâm kimesneler şehâdetleri ile şer‘an sâbit olan Mustafa Bey b. Hasan nâm kimesne meclis-i şer‘-i şerîfde Samatya cemâ‘atinden bâ‘isü’s-sifr İsak v. Avraham nâm Yahudi tarafından husûs-ı âti’l-beyâna vekîl olduğu Receb Bey b. Hacı Hamza ve Mustafa b. Ali nâm kimesneler şehâdetleriyle şer‘an [sâ]bit olan Mehmed Çavuş b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Sâliha mahmiye-i mezbûrda ( ) mahallesinde vâki‘ ma‘lûmü’l-hudûd şişehânesini müvekkil-i mezbûr İsak’a bundan akdem elli beş bin akçeye îcâr ve teslîm mezbûr İsak dahi istîcâr ve tesellüm ve on altı ay zabt edip on altı aylık ücreti olan seksen bin akçeyi müvekkilem mezbûreye teslîm edip bâkī bir aylık ücreti hâlâ vekîl-i mezbûr Mehmed Çavuş bana teslîm edip ben dahi müvekkilem için alıp kabz eylediğimden sonra zikr olunan şişehânenin ecr-i misli ayda altışar bin akçe olup ve müvekkilem mezbûre Sâliha dahi mukaddemâ mezbûr İsak’[a] ta‘mîr etmek şartıyla îcâr edip ol dahi şart-ı mezkûr ile istîcâr etmekle on yedi ayda ecr-i misli olan yüz iki bin akçeden vech-i muharrer üzre makbûzumuz olan seksen beş bin akçeden bâkī on yedi bin akçeyi dahi vekîl-i mezbûr Mehmed Çavuş’dan taleb ettiğimde ba‘de’n-nizâ‘ muslihûn tavassut edip mezbûr Mehmed Çavuş ile beynimizde altı esedî guruş üzre inşâ-i akd-i sulh ettiklerinde ben dahi bi’l-vekâle sulh-i mezbûru kabûl ve bedel-i sulh olan meblağ-ı mezbûru vekîl-i mezbûr Mehmed Çavuş yedinden tamâmen işbu meclis-i şer‘de ahz u kabz ettiğimden sonra husûs-ı mezbûr ve beynimizde ma‘lûm cam husûsuna ve müvekkilemin mukaddemâ mezbûr İsak’a sermâye edilmek için verdiği yüz yirmi bin akçeye müte‘allika âmme-i hukūk-ı ma‘lûme ve mechûle da‘vâsından mezbûr İsak’ın ve kefîlleri olan zevce-i halîlesi Havron’a ve oğlu Yako vekîl-i mezbûr Mehmed Çavuş’un zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d mazmûnu kitâba muhâlif benden bi’l-vekâle ya müvekkilemden bi’l-asâle da‘vâ dahi sudûr ederse makbûle ve mesmû‘a olmasın dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Fahrü’l-eşbâh Veli Çavuş, Resul Efendi el-İmâm, Berber Süleyman b. ( ), Mehmed Çelebi b. Abdülmennân, Baba Resul b. Rıdvan. Derkenâr: Kâtib sehv etmek tekrâr on beş varak aşağıya kayd olundu. Mühür.