Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 156 Hüküm no: 169 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kara Mustafa’nın oğlu Muharrem’in ölen vasîsi Mehmed b. İbrahim’deki alacağının tahsil edildiği Mahmiye-i Galata mahallâtından Câmi‘-i Kebîr mahallesi sâkinlerinden olup, bundan akdem fevt olan merhûm Kara Mustafa b. ( ) nâm kimesnenin sagīr oğlu Muharrem’e bundan akdem vasî nasb olunan Mehmed b. İbrahim nâm kimesne fevt oldukda, sagīr-i mezbûrun tesviye-i umûruna hâlâ vasî nasb olunan İsmail b. Musa mahfil-i kazâda mahfil-i kazâda, vasiyy-i mezbûr Mehmed’in sulbiye kebîre kızı Züleyha tarafından husûs-ı âti’z-zikre vekîl olup, hasm-ı şer‘-i câhid mahzarında bimâ hüve nehc-i şer‘î vekâleti sâbite olan Avcı Hasan b. Mehmed ve müteveffâ-yı mezbûrun zevce-i metrûkesi olup sagīre kızı Kerime’ye kıbel-i şer‘den vasî nasb olunan Şehriban Hâtun bt. Abdullah mahzarlarında bi’l-vesâye ikrâr ve i‘tirâf edip, müteveffâ-yı mezbûr hâl-i sıhhatinde min vechi’l-vesâye hâlâ vasîsi olduğum sagīr-i mezbûr Muharrem’in elli altı bin beş yüz akçe hisse-i şer‘iyyesini zabt ve hıfz etmiş idi. Hâlâ vesâyet-i mahkiyem hasebiyle meblağ-ı mezbûr elli altı bin beş yüz akçeyi vekîl-i mezbûr Hasan ve vasiyy-i merkūme Şehriban Hâtun yedlerinden bi’t-tamâm alıp kabz eyledim. Min ba‘d müteveffâ-yı mezbûr zimmetinde sagīr-i mezbûrun bir akçe ve bir habbesi bâkī kalmadı dedikde, vasiyy-i merkūmu cemî‘-i kelimât-ı meşrûhasında el-mukarru lehümü’l-merkūmân dahi bi’l-muvâcehe vekâleten ve vesâyeten ve asâleten tasdîk edicek, mâ-vaka‘a gıbbe’t-taleb ketb olundu. Tahrîren fî evâili Zilhicce li sene 1023. Şuhûdü’l-hâl: Mehmed b. Mahmud, Mahmud b. Musa, İbrahim b. Mustafa, Yusuf b. Ali, Ahmed b. Şükrullah, Receb b. Ahmed, Mehmed b. Abdullah, Ali b. Abdullah, Mustafa b. Mehmed ve gayruhüm.