Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 162 Hüküm no: 176 Orijinal metin no: [61b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Kapudân b. Abdülmennân’ın damadı Süleyman Çelebi b. Musa Bey’i vasî tayin ettiği Mahmiye-i Galata mahallâtından Câmi‘-i Kebîr mahalle[si] sâkinlerinden fahrü’l-a‘yân Süleyman Çelebi b. Musa Bey eş-şehîr beyne’n-nâs bi kapudân mahfil-i kazâda, bundan akdem Donanma-yı Hümâyûn seferinde Koron nâm kasabada fevt olan merhûm Hasan Kapudân b. Abdülmennân nâm kimesnenin sulbî oğlu Mehmed Çelebi nâm kimesne mahzarında takrîr-i kelâm ve ta‘bîr ani’l-merâm kılıp, müteveffâ-yı mezbûr Hasan Kapudân-ı merhûm vesâyâ-yı şer‘iyyesi nâfize ve teberru‘ât-ı mer‘iyyesi câriye ve mu‘teberem olduğu hâlde, malından otuz bin fıddî-i Osmânî akçe ile yüz aded tâmmü’l-vezn kâmilü’l-ayâr zehebî flori vasiyyet edip, meblağ-ı mezbûr otuz bin akçe techîz ve tekfînine ve yevm-i mezbûrda lâzım gelen mühimmâtına üçünde ve yedisinde ve kırkında ve yılında it‘âm-ı ta‘âm ve tasadduk-ı erâmil ve eytâm için sarf ve bezl olunup, kezâlik meblağ-ı mezbûr yüz flori salâh-ı hâl ile ma‘rûf ve istikāmet ve diyânet ile mevsûf şerâit-i umre ve hacc-ı şerîf ahvâline vakf-ı tâm ile âlim ve vâkıf bir kimesne yediyle benim için hacc-ı şerîf ediverip, sevâbını rûhuma ihdâ eyleye deyû vasiyyet edip ve bu tafsîl üzre vasiyyetin tenfîzine beni vasî ihtiyâr edip vasiyyet-i merkūme üzerine musırran fevt olmuşdur. Hâlâ vasiyyet-i mezbûre üzerine malı dahi müsâ‘iddir ki der kîseden meblağ-ı mezbûr ihrâc olunup tenfîz olunmasın taleb ederim dedikde, gıbbe’s-suâl mezbûr Mehmed Çelebi inkârıyla cevâb vermeğin, müdde‘î-i mezbûrdan beyyine taleb olundukda, udûl-i müslimînden Cafer Reis b. Abdullah ve Ramazan Reis b. Hayrullah nâm kimesneler meclis-i şer‘a li ecli’ş-şehâde hâzırân olup, fi’l-hakīka [62a] müteveffâ-yı mezbûr Hasan Kapudân vesâyâ-yı şer‘iyyesi câriye olduğu hâlde hâlis malından otuz bin fıddî-i Osmânî akçe ve yüz aded tâmmü’l-vezn sikke-i hasene vasiyyet edip, meblağ-ı mezbûr otuz bin akçe techîz ve tekfînine ve yevm-i mezbûrda lâzım gelen mühimmâtına ve üçünde ve yedisinde ve kırkında ve yılında it‘âm-ı ta‘âm ve tasadduk-ı erâmil ve eytâm için sarf olunup kezâlik yüz aded flori irsâl müttakī, umre ve hacc-ı şerîf ahvâline vukūf ve şu‘ûru olan kimesne yediyle hac ediverilip sevâbını rûhuma hediye eyleye deyû vasiyyet edip, bu tafsîl üzre tenfîzine dâmâdı mezbûr Süleyman Çelebi’yi vasî ihtiyâr edip, vasiyyet-i merkūme üzerine bizim huzûrumuzda musırran fevt oldu, bu husûsa şâhidleriz, şehâdet dahi ederiz dediklerinde, gıbbe’t-ta‘dîl ve’t-tezkiyye şehâdetleri hayyiz-i kabûlde vâki‘ oldukdan sonra mûcebiyle hükm olunup, mâ-vaka‘a gıbbe’t-taleb ketb olundu. Tahrîren fî evâhiri Şevvâli’l-mükerrem li sene selâse ve ışrîn ve elf. Şuhûdü’l-hâl: Fahrü’l-mülâzımîn Mevlânâ Ömer Efendi, Memi Reis b. Abdullah, İbrahim Çavuş el-Bevvâbü’s-sultânî, Mehmed Bey b. Cafer Ağa mine’l-Muhzırûn ve gayruhüm.