Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 659 Hüküm no: 845 Orijinal metin no: [101b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fazlullah Beşe b. Ahmed’in, Uzun Ali’den satın aldığı câriyenin sahibi çıkması üzerine satışa kefil olan Ahmed Beşe b. Abdullah’tan bedelini talep ettiği Esirci tâifesinden Fazlullah Beşe b. Ahmed nâm kimesne meclis-i şer‘de Ahmed Beşe b. Abdullah nâm kimesne mahzarında üzerine da‘vâ ve [takrîr-i] kelâm edip bundan akdem Mahmiye-i İstanbul’da Esirhanı’nda gāib ani’l-meclis Uzun Ali b. ( ) nâm kimesneden orta boylu, açık kaşlı, kara gözlü Hırvadiyyü’l-asl Bâğıcinan bt. Abdullah nâm câriyemi elli beş esedî guruş ile on guruş kıymetli bir cevher dâr tüfenge iştirâ ve def‘-i semen ettiğimde mezbûr Ahmed Beşe eğer câriye-i mezbûrda âhar müstahık çıkıp sana bir zarar isâbet ederse mezbûr Ali Beşe’ye def‘ eylediğin semen-i mezbûra ben zâmin oldum deyû kefîl olmuşidi mukaddemâ câriye-i mezbûreyi ben Mehmed Bey nâm kimesneye semen-i ma‘lûma bey‘ ve kabz-ı semen edip ol dahi Mustafa Beşe nâm kimesneye semen-i ma‘lûma bey‘ ve kabz-ı semen eyledikden sonra câriye-i mezbûreye Havâss-ı Refî‘a kazâsı nevâhîsinden Ereğli nâhiyesine tâbi‘ Selman nâm karye sükkânından Hasan Beşe b. Mustafa nâm kimesne müstahık çıkıp mezbûrun vekîli olan Ahmed Çelebi nâm kimesne muvâcehesinde isbât ve ba‘de’l-hükm câriye-i mezkûreyi yedinden alıp kabz ettikde vekîl-i mezbûr dahi müvekkilinin semen deyû bâyi‘ olan merkūm Mehmed Bey’e def‘ eylediği meblağa mürâca‘at edip hükm-i hâkim ile yedinden ahz u kabz ettikde mezbûr Mehmed Bey’in husûs-ı mezbûra tarafından vekîli olan zevcesi Gülgûn nâm hâtun dahi müvekkil-i merkūm Mehmed Bey’in bana def‘ eylediği semen-i mezbûra mürâca‘at edip hükm-i hâkim ile yedimden ahz u kabz etmeğin hâlâ benim dahi bâyi‘im olan mezbûr Uzun Ali Beşe’ye def‘ eylediğim semen-i mezbûru merkūm Ahmed Beşe’den kefâletine binâen taleb ederim suâl olunsun dedikde, gıbbe’s-suâl mezbûr Ahmed Beşe vech-i meşrûh üzre câriye-i mezbûreye âhar müstahık çıkıp almağla mezbûre Gülgûn vech-i muharrer üzre merkūm Fazlullah Beşe’ye mürâca‘at edip hükm-i hâkim ile semen-i mezbûru yedinden ahz u kabz eylediğini ikrâr, lâkin vech-i meşrûh üzre olan kefâletini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i mezbûrda Kumkapı kurbunda Bâli Paşa mahallesi sükkânından olan Ali Beşe b. Abdullah ve Mustafa b. Süleyman nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i merkūm Fazlullah Beşe câriye-i mevsûfe-i mezkûreyi merkūm Ali Beşe’den elli beş esedî guruş ile on guruş kıymetli bir cevher dâr tüfenge iştirâ ve def‘-i semen eyledikde mezbûr Ahmed Beşe câriye-i mezbûreye dahi müstahık çıkıp sana bir zarar isâbet ederse mezbûr Ali Beşe’ye def‘ eylediği semen-i mezbûra ben zâmin ve kefîl oldum deyû bizim huzûrumuzda kefîl olmuşdu, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sânî aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: İbrahim Çelebi b. Ahmed, Mehmed b. Ramazan, Resul [b.] Rıdvan, Abdi Çelebi b. Hasan.